DILI, STLTIMORLESTE.com – Ministeriu Edukasaun (ME) liu husi Edukasaun Munisipiu Dili, inspetor sira neebe destakadu kontinua halo observasaun ba ezame pasajen ba eskola sira iha Munisipiu Dili.
Lia hirak nee hatoo husi Superintendente Edukasaun Munisipiu Dili, Cesarina Correia Guterres ba jornalista STL, Segunda (17/11/2025).
Nia dehan, inspetor ensinu baziku sira balun tuir formasaun reforma kurikulu 7 ano.
“Ita nia inspetor ensinu baziku sira balun tuir formasaun reforma kurikulu 7 ano, no hau mos agora atu ba Maliana, ba supervisiona formasaun refere. Maibe inspetor neebe la destaka kontinua halo observasaun nafatin ezame pasajen iha eskola sira, kontinua observa atividade ezame ba estudantes sira iha kada eskola,” nia deklara.
Nia hatutan, inspetor sira neebe la destakadu signifika katak, sira neebe la hetan servisu atu tuir formasaun nafatin halo observasaun ba atividade ezame periodu. Nee duni inspetor hirak nee mak sei monitoring ezame ba iha eskola sira.
Iha fatin seluk, Diretor Servisu Edukasaun Munisípiu Bobonaro, Miguel Freitas hatete, kona-ba ezame pasajen ninia nee eskola idak-idak mak sei prepara materia, ho nunee estudantes sira bele halao ezame refere. Husu estudantes sira prepara estuda, tanba durante nee sira partisipa ona iha prosesu ensinu aprendizajen ninia.
“Hau hanoin kona-ba ezame pasajen ninia nee ita nian eskola idak-idak mak sei prepara materia, ho nunee estudantes sira bele halao ezame refere ho diak,” dehan nia.
Nia hatutan, tanba nee husu ba estudantes sira atu prepara estuda, tanba durante nee sira partisipa ona iha prosesu ensinu aprendizajen ninia.
Jornalista: Jacinta Sequeira
Editora: Domingas Gomes
