DILI, STLTIMORLESTE.com – Ministru Interior (MI) Francisco da Costa Guterres anota hela problema ka preokupasaun husi Unidade Polísia Maritma (UPM) hodi kontrola Tasi Timor, liu-liu kona-ba fasilita no infraestrutura.
“Transporte maritima hanesan roo lansa rapidas nee ita tenke investe ba sira, atu sira halao patrulhamentu iha area kosteira sira nee hotu-hotu kedas, ida nee mak ita komesa tau faze por faze. Mais Governu tau ona ano ba investimentu iha 2026, 2027 no 2028 nee ba UPM,” hateten Ministru Interior (MI), Francisco da Costa Guterres ba jornalista sira hafoin remata serimonia aniversariu UPM ba dala 23 iha resintu UPM Largo Lesidere, Tersa feira (27/05/2025).
Nia dehan, investimentu ba sira nee importante tebes, no iha tinan 2025, 2026 too 2027nee hahu halo investimentu ba Komando PNTL liu-liu unidade sira neebe sei hasoru difikuldade boot iha terenu.
“Governu sei investe, sei diskute konaba meius neebe Governu tenke tau sira didiak atu ultrapasa, ameasa neebe sufístikadu sira neebe mak mosu, se ita la prepara sira didiak no ita la investe ba sira, ameasa neebe mai dala barak liu sira la konsege responde,” esplika nia.
Governante nee deklara, investimentu primeiru mak tenke iha formasaun neebe diak ba membru PNTL sira, ekipamentu neebe mak tau nee para fasilita sira hodi halao servisu ho diak.
“Iha infraestrutura ita hanoin hela atu ida nee ba deit sira nia Kuartel, fatin bele halo formasaun, fatin halo kuartel ida boot nee ita tenke buka fali fatin ida para atu investe, ita tenke harii mos portu ida apropriadu no fatin estratejiku hodi bele halo patrulhamentu,” nia haktuir.
Nunee mos Komandante Unidade Polísia Maritima (UPM), Superintendente Polísia, Eugénio Pereira sujere ba entidade relevante sira atu tau matan ba UPM hodi iha kapasidade natoon atu kontrola no prevene aktu ilisitu sira neebe akontese iha zona kosteira.
“Bazeia ba iha provabilidade kabe ba iha risku no ameasa, tantu asaun estratejiku sira neebe ami aprezenta presiza tebes apoiu husi entidade kompetente ba iha area seguransa no defeza, no entidade sira seluk neebe atu bele fortalese kapasidade no kompetensia Polísia Maritima nian hodi prevene, deteta, kombate aktu ilisitu iha zona Kosteira,” katak nia.
Nia koalia, investimentu ba sistema teknolojia intelijensia no kria baze de dadus integradu relasiona ho aktu ilisitu iha zona maritima no utilizasaun ba sistema ekipamentu. No kondisaun no efikas ba iha UPM presiza duni nia investimentu estratejiku, kapasitasaun téknika no kooperasaun institusional hodi bele proteje rekursu marimu iha zona kosteira.
“Ita ida-idak sai hanesan parte ida mos atu fo kontribuisaun no satisfasaun ba iha ita nia estadu no mos ita nia povu,” nia afirma.
(jen)
