DILI, STLTIMORLESTE.com – Ministra Saude (MS), Élia A. A. dos Reis Amaral laiha vontade atu halo intervensaun ida neebe ho karakter urjensia ba situasaun iha Hospital Nasional Guido Valadares (HNGV), maibe fo liu prioridade ba ajenda Ajensia Internasional nian, hodi promove sira nia interese.
Xefe Bankada Partidu Libertasaun Popular (PLP), Maria Angelina Sarmento hatete, Ministeriu Saude (MS) fo prioridade liu ba ajenda Ajensia Internasional nian, maibe laos foti prioridade ba situasan neebe akontese iha Hospital Nasional Guido Valadares (HNGV).
“Tinan ida ho balun ona, ita haree hotu katak, Ministeriu Saude neebe lideransa Ministra Saude laiha vontade atu intervensaun ida neebe ho karakter prioridade urjensia ba situasaun iha HNGV, maibe ami haree ita boot fo liu prioridade ba ajenda Ajensia Internasional nian, hodi promove sira nia interese, sira hatene katak ita nia frakeza iha setor saude, sira uza ita halo promove adovakasia ba ajenda sira neebe mak Ajensia Internasional halo hela, maibe sira rasik la halo kontribui atu bele hamenus probelma sira neebe ita hasoru iha problema saude,” hatete Xefe Bankada PLP, Maria Angelina iha ambitu debate OJE 2025, faze espesialidade iha Plenaria Parlamentu Nasional, Sesta (15/11/2024).
Situasaun Saude tuir Xefe Bankada PLP nee sai preokupasaun boot liu iha atendimentu HNGV no Dividas iha Hospital Rai liur.
Ba atendimentu hospital Díli, ita hotu hatene katak, falta aimoruk halo mudansa ba pesoal saude sira neebe laiha esperiensia, tanba nee ligadu ho ema nia vida, desizaun sira neebe ita foti kona-ba mudansa ba pesoal saude sira nee tenke kuidadu,” nia informa.
Iha fatin hanesan, Deputada Bankada CNRT, Maria Gorumali Barreto esplika, tratamentu saude iha HNGV no Sentru Saude sira iha Munisipiu atendimentu lao hela.
Hatan ba Prekupasaun, Visi Primeiru Ministru no Ministru Koordenadór ba Asuntu Sosiál, Mariano Assanami Sabino hatete, kona-ba politizasaun ba Saude no edukasaun, politizasaun nee dezde inisiu kedas, governu ida nee esforsu para Saude labele iha tan politizasaun ona.
(jen)
