BAUKAU, STLTIMORLESTE.com – Ministra Saude, Elia dos Reis Amaral lakohi fo komentariu kona-ba problema atendimentu ba pasiensia labarik kiik sira neebe daudaun baixa iha Hospital Nasional Guido Valadares (HNGV) Dili.
Segunda semana nee liu husi plenaria iha uma fukun parlamentu nasional, Deputada Bankada partidu Kongresu Nasional Rekunstrusaun Timor (CNRT), Virgina Ana Belo ho matan been toka labarik sira neebe oras nee halao tratamentu iha Hospital Nasional Guido Valadares (HNGV), prezisa tulun husi Governu, tanba atendimentu la diak no kada loron iha pasiensia labarik sira mate beibeik.
Nunee mos Deputadu Bankada FRETELIN, David Dias Ximenes “Mandati” preokupa kona-ba problema iha setor saude neebe too oras nee governu seidauk rezolve, no kauza husi problema refere tanba governu liu husi Ministeriu Saude hasai no substitui profisional saude sira hodi prezudika ba Hospital la iha kualidade.
Liga asuntu nee STL aproveita vizita ofisial Primeiru Ministru Kay Rala Xanana Gusmão nian iha Munisipiu Baukau neebe akompanha mos husi Ministra Saude no membru Governu sira seluk, neebe STL tenta konfirma Ministra Saude, Elia dos Reis Amaral, maibe lakohi fo komentariu, tanba razaun deklara ona liu husi konferensia imprensa iha pajina ofisial Palácio das Cinzas.
“Nee ohin sira halo tiha ona konferensia imprensa, ita boot bele akompanha konferensia imprensa nee,” hateten Ministra Saude Elia dos Reis Amaral hasoru STL iha salaun Sentru Konvensoens Vila Antiga Baukau, Tersa (17/03/2026).
Mezmu Ministra nee hatan nunee, STL tenta nafatin husu Ministeriu Saude nia esforsu ba asuntu nee, maibe Ministra nee nafatin hatan “Ita boot bele akompanha konferensia imprensa nee, obrigada,” nia hakotu.
(tom)
