DILI, STLTIMORLESTE.com – Liu husi aprezentasaun Orsamentu Jeral Estadu (OJE) 2026, Ministru Defeza, Kontra Almirante Donaciano Costa Gomes “Pedro Klamar Fuik” hakarak aumenta osan adisional ho montante millaun US$ 49.
Governante nee dehan, tetu inisial neebe mak Ministeriu Defeza hetan iha US$ 8,000,300 (oito milhoes trezentus dólar). Nunee Ministeriu Defeza iha ambitu diskusaun iha Komisaun Revizaun Orsamentu (KRO) husu tan millaun US$ 49.
“Orsamentu nee sei prioriza ba programa espesial sira mak hanesan sustensaun forsa nian, tanba nee parte integrante oinsa mak ita nia Governu, ita nia Estadu haree para bele mantein ita nia forsa,” hatete Ministru Defeza, Kontra Almirante Donaciano Costa Gomes “Pedro Klamar Fuik” ba jornalista sira hafoin aprezenta orsamentu 2026 Ministeriu Defeza, Falintil-Forsa Defeza Timor-Leste (F-FDTL), Institutu Defeza Nasionál ba Komisaun Revizaun Orsamentu iha Ministeriu Finansas, Segunda (11/08/2025).
Nia esplika, objetivu Ministeriu Defeza husu osan adisional ho US$ 49 millaun atu reforsa programa Ministeriu nian neebe foka ba implementasaun lei peogramasaun militár nian.
Iha binan nee Klamar Fuik informa mos katak, ba orsamentu (F-FDTL), tetu inisiál iha millaun US$ 31, maibe husu adisionál millaun US$ 12.
F-FDTL husu adisionál ba iha orsamentu tinan oin nee ho razaun haree ba atu aumenta efetivu tinan oin, haree mos ba bem estar militár sira nian neebe mak atu aumenta ho tan nesesidade seluk neebe mak iha.
Nia tenik, orsamentu Institutu Defeza Nasionál (IDN) ba tinan oin U$S 1,000,606 (um milhão seiscentos e seis), maibe IDN husu adisionál uma milhoes e sete.
Nia deklara, IDN husu orsamentu adisionál nee ho objetivu, tanba tinan oin sei loke akademia militár konjunta.
“Orsamentu inisiál no ba iha adisionál ba Ministeriu Defeza no F-FDTL inklui IDN ba tinan oin nee raziavel. Maibé proposta neebe mak instituisaun hirak nee hotu aprezenta atraves husi Ministeriu Defeza iha konsiderasaun diak husi Ministeriu das Finansas, liuliu husi komisaun revizaun,” nia hatutan.
Nia afirma, KRO liu husi Prezidente Komisaun Revizaun Orsamentu sei halo diskusaun klean ho Ministeriu Finansas, hafoin deside bele aumenta ka lae, nee depois mak haree no oinsá mak prioritiza hodi atribui orsamentu sira nee.
(jen)
