DILI, STLTIMORLESTE.com – Ministru Interior, Francisco da Costa Guterres hateten, daudaun nee hein hela desizaun Tribunal neebe oras nee Tribunal halo interogatoriu ba membru Polisia Nasional Timor Lorosae (PNTL) ida, neebe mak deskonfia halo falsifikasaun dokumentus veteranus nian.
“Kazu nee sei lori ba iha tribunal, sei tribunal dehan nia sala, iha medidas forte ba nia, ida nee asuntu ida neebe importante teb-tebes ba nia, sei nia falsifika dokumentus, ita tenke reve fila fali sira nia estatutu hotu, sei hetan sansaun ida neebe todan liu, tanba nee hein desizaun tribunal,” dehan Ministru Interior, Francisco da Costa Guterres ba jornalista sira hafoin partisipa iha debate espesialidade Orsamentu Jeral Estadu tinan 2026.
Nia haktuir tan katak, dadaun nee sei iha prezusaun inosensia (praduga tak bersalah), tanba nee sei nafatin konsidera membru PNTL nee la salah, too tribunal deside katak, membru PNTL nee salah maka sei foti desizaun hasoru nia.
Responde kona ba membru PNTL iha Likisa detein membru Serbisu Nasional Intelijensia (SNI) nain rua neebe hatama sasan ilisitu, Ministru Interior dehan, kona ba kazu nee mos sei iha prosesu investigasaun ita hatama ona ba iha ministeriu Publiku.
Nia dehan, identifikasaun ba kazu nee kerdizerke halo deit aprezentasaun regular, kazu nee depende ba iha tribunal katak ida nee nia la lori halai sai, nia la destroi evidensia, tanba nee maka halo aprezentasaun regular deit.
“Sei ema nee ita husik depois nia destroi evidensia, entaun ema nee tau iha prizaun preventiva, ida nee buat rua neebe ke sai diferensia, tanba nee hau hanoin, kazu ida nee depende ba tribunal dehan katak, sira aprezentasaun regular, ita lao tuir desizaun tribunal, tanba polisia labele halai hasoru desizaun tribunal ninian no ministeriu publiku ninia desizaun nee, tanba nee prosesu ba kazu nee hatama ona iha Ministeriu Publiku sei halo julgamentu iha Tribunal, ita labele hakat liu tribunal ninia desizaun, sei ita manda fali tribunal, ida nee ita sala ona, ida nee ita laos ona nasaun aplika demokrasia, tanba nee ita tenke lao tuir koridor legal neebe maka iha ho lei neebe maka ita iha, lao tuir ida nee,” dehan Ministru.
Tuir informasaun neebe STL asesu katak, Ofisial Superior Polisia Nasional Timor-Leste (PNTL) nain-ida ho inisial AQ suspeitadu envolve iha kazu falsifikasaun dokumentu ba verifikasaun dokumentu veteranu iha Munisipiu Lautem.
Portavos interinu Komandu PNTL Superintendente Asistente Polisia Mouzinho Correia esplika, Komandu Jeral PNTL hatun ona despaisu atu husu parte Diresaun Nasional Servisu Investigasaun Kriminal (DNSIK) atu haklean investigasaun.
“Despaisu tun ona ba Diresaun Servisu neebe responsabilidade kriminal, ita sei halo tuir planu no asaun. Naturalmente ita sei buka testamunha sira, liu-liu mos ba Komisaun Verifikasaun Dadus Veteranu Munisipiu Lautem,” Mouzinho Correia hateten ba Jornalista sira iha sala konferensia impresa Ministeriu Interior Vila-Verde, Kinta semana kotuk.
Ho kazu nee, Komandu seidauk bele halo konkluzaun ruma ba kazu ida-nee maibe iha parte seluk, PNTL mos notifika ona ema nain rua neebe molok nee apresenta ona keisa mai Polisia relasiona ho kazu neem, tanba nee tempu badak ekipa ida sei ba iha Munisipiu Lautem hodi rekolha tan informasaun ba parte relevante sira.
Jornalista: Joseph Koa
Editor: Joseph Koa
