DILI, STLTIMORLESTE.com – Misa Agradesimentu ba selebrasaun loron nasional 12 Novembru 1991, ba dala 33, prezidi husi Kardeal Dom Virgilio do Carmo da Silva, SDB.
Liu husi omilia Kardeal Dom Virgilio do Carmo da Silva, SDB katak, loron ohin hanoin fila-fali buat hotu neebe mak akontese iha Santa Kruz, hanoin fila-fali hodi agradese ba Nai Maromak, hirak nee hotu Nai Maromak halo, nee duni mai iha dalan neebe diak liu mai ema idak-idak fiar nain, bele hahu loron ohin, hodi hanoin ida deit, hodi halibur hamutuk agradese ba Maromak ba buat hotu-hotu neebe hetan liu husi eventu istoriku neebe selebra daudaun.
“Iha segunda leitura iha termus seluk neebe deskreve matenek nian hodi bolu ita hanoin fila-fali kona-ba ita nian vokasaun sarani nian katak, ema hotu-hotu batizmu ou atu sai ema ida deit. Maske ita hotu lisan neebe la hanesan, distritu neebe la hanesan, maibe tanba ita nian batizmu, ita hotu hola parte,” dehan Kardeal Dom Virgilio do Carmo da Silva, SDB liu husi omilia iha igreja Motael, Tersa nee (12/11/2024).
Iha selebrasaun loron 12 Novembru ba dala 33, hetan marka prezensa husi membru governu balun, deputadu no deputadu, sarani no mate restu 12 Novembru, Eis titulares, Veteranus, Tenenti Jeneral Reformadu, Lere Anan Timur.
Komemorasaun masakre Santa Kruz 12 Novembru 1991 ba dala 33 ho tema prinsipal mak orgulhu ho ita nia istoria no hamutuk dezenvolve ita nian nasaun ida Prosperu iha futuru, hafoin misa halo marsa hahu husi igreja Motael too iha Masakre Santa Kruz.
(jac)
