DILI, STLTIMORLESTE.com – Komemora Proklamasaun Unilateral Independensia Timor Leste (TL) ba dala 50, ho misa agradesimentu iha Igreja Katedral Dili.
Vigariu Jeral Dioseze Baukau, Padre Alipio Pinto Gusmao dehan, selebrasaun eukaristia ida nee hodi hasae agradese ba Maromak, ba aniversariu independensia tinan 50.
“Independensia ba Ita rain, hanoin balun atu partilla ba ita boot sira iha eukaristia tolu loron ohin nian, liafuan tolu neebe atu partilla mak ida, husi salmu nee foin ita rona dehan Maromak hanoin ita, haraik bensa mai ita, husi liafuan ida nee ita bele komprende kedas ita nia rain neebe kiik, povu neebe kiak, povu neebe simples maibe ita hatene fiar ba Maromak hanoin ita, haraik bensa mai ita,” hatete Vigariu Jeral Dioseze Baukau, Padre Alipio Pinto Gusmao Liu husi omilia wainhira prezide misa agradesementu komemorasaun aniversariu tinan 50 Independensia TL, iha Igreja Katedral Dili, Kinta (27/11/2025).
Pe. Alipio hatete, ezemplu Xefi Estadu Maior Jenerál Forsa Armada Tenente Jeneral Domingos Raul Falur Rate Laek neebe luta kleur iha ailaran sira komprende diak tebes-tebes kbiit laek, forsa uituan, nunee ikus mai bele hetan rezultadu tanba Maromak hanoin no haraik bensa mai Timor oan.
“Ita iha razaun ida nee mak selebra Eukaristia hodi agradese ba Maromak, kuandu funu liu ita sira iha nee dehan hanesan nee sorte Maromak iha nee mak ita sei moris, maibe dala ruma liafuan ida nee ladun loos ida, tanba mate nee mos laos Maromak laiha mak sira mate, maibe Maromak iha planu ba ita nia rain no ba ita ida-idak no Maromak hanoin ita, haraik bensa mai ita,” hatete Padre nee.
Iha omiiia Pe. Alipio hatete, liafuan segundu husi liafuan Evanjelhu, Jesus dehan, “imi hadomi malu nuudar hau hadomi imi, liafuan ne e uluk nanain hatudu mai ita, no dehan mai ita katak ita niia identidade nuudar eskolante Kristu nian mak ita hadomi malu”.
São Paulo koalia mai iha segunda leitura, dehan koalia kona ba domin la laran nakali, domin la hirus, domin nee perdua malu, atu gosta foin lalais debate iha Parlamentu Nasional nee sira koalia ba malu makaas, maibe hotu konversa oin midar ba malu, ida-ne’e mak domin.
“Hadomi malu hatudu liu husi saran aan, fo ita nia aan atu ema seluk bele moris neebe hanoin selebra tinan 50 proklamasaun independensia reflete uituan kona ba ida nee, hau saran aan atu hauu nia rai no povu ida-ne’e bele moris, mak liu husi knaar sira neebe simu, servisu neebe ita halo nuudar espresaun domin neebe ita hatudu ba ema seluk liu husi sara ita nia aan,” Nia tenik.
Nia afirma, tanba nee hanoin ba pasadu, eroi sira saran aan hodi povu nia moris no liberta patria, hanesan Jesus Kristus sara-aan iha Cruz mate iha cruz atu ema bele moris.
Liafuan terseiru, espresaun husi domin nee kuandu ema atu saran nia aan atu ema seluk moris.
Iha Fatin hanesan, Prezidente Komisaun Organizadora ba Komemorasaun loron Proklamasaun Independensia RDTL ba da-50, Tomas do Rosario Cabral, agradese ba parte hotu neebe partisipa iha misa agradesimentu nee
“Ita selebra tinan 50 ba kotuk, eziste mos sofrimentu boot iha kotuk. Ita sei asegura fila fali konfiansa iha prezente, iha esperansa ida ba ita-nia rai,” nia dehan.
Partisipa iha misa agradesimentu proklamasaun Independensia TL ba dala 50 nee partisipa husi membru governu, PNTL, diplomata no sarani sira.
Jornalista: Joaninha Belo
Editora: Domingas Gomes
