DILI, STLTIMORLESTE.com – Misa Funebre Amu Papa Francisco sei halao iha Tasi Tolu, iha loron Sabadu, misa hahu tuku 06.00 loraik, misa prezide husi Dom Leandro Maria Alves.
“Misa Funebre Amu Papa Francisco ninian, ita sei halao iha loron Sabadu (26/04/2025), tuku 06:00 loraik, iha Tasi Tolu,” hatete Vigariu Episcopal Assuntu Pastoral Arkedioseze Dili, Amu Jovito Rego de Jesus Araujo liu husi konferensia imprensa iha Camara Eclesiastica Lesidere Dili, Kuarta (23/04/2025).
Amu Jovito hatete, Arkedioseze Dili husu deskulpa ba sarani sira, tanba antes nee komunika tiha ona ba publiku katak misa sei halao iha loron Domingu (27/04/2025), maibe wainhira simu komunikadu ofisial husi Vatikanu katak Amu Papa Francisco ninia misa funebre iha Vatikanu sei halao iha tuku 10:00 dadersan, loron 26 Abril 2025, iha Roma.
Tanba nee ohin hamutuk ho Ministru Administrasaun Estatal (MAE), hakarak hatudu nafatin ba publiku katak, wainhira Amu Papa vizita ita nia rai, Governu ho Igreja servisu hamutuk atu simu, tan nee foin liu fulan hirak liu ba Amu Papa Francisco Maromak bolu hikas ona ba ninia kadunan rahan laek.
Amu Jovito hatete, tanba nee Governu ho Igreja dala ida tan servisu hamutuk atu halo eventu ida nee lao ho diak, sai eventu ida neebé manifesta nafatin povu Timor, sarani Timor, igreja iha Timor ninia domin ba Amu Papa Francisco ho ninia debilidade fizika, maibe hakaas aan duni mai vizita hela ita molok ba rohan laek.
“Iha eventu ida nee ita hotu-hotu hetan konvite atu ba selebra misa Funebre Amu Papa nian, regras sira sei lao tuir protokolu neebe estabelese ona husi MAE hanesan reprezentante Governu ninian atu servisu nafatin iha area ida nee, koordena ona ho autoridade sira PNTL ho departamentu hotu-hotu neebe iha ninia knaar, atu halao idak-idak ninia funsaun iha momentu ida nee,” hatete Amu Jovito.
Amu Jovito husu sarani atu koopera diak ho autoridade neebe simu knaar atu mantein orden hodi selebrasaun lao diak, kona-ba atributu sira kamizola, sapeu, subrina, idak-idak lori ninian atu manifesta nafatin mundu, ita entuziasmu ita nia domin ida neebe ita manifesta iha loron 9-11 Setembru 2024, sei manas nafatin iha ita nia leet ka lae, ita sei iha nafatin jeitu ida neebe doko mundu ho ita ninia prezensa tinan kotuk ninian, husu sarani sira hotu atu partisipa kolabora ho respeitu ba atividade ida neebe ita fo dala ikus ona ba Amu Papa, husu ba hotu -hotu atu lao tuir saida mak estabele ona no neebe entrega ona ba PNTL atu organiza.
Iha fatin hanesan, Ministru Administrasaun Estatal (MAE), Tomas Cabral hatete, Governu servisu hamutuk ho Igreja, apoiu Igreja Katolika para halao serimonia Misa Funebre Amu Papa iha Tasi Tolu, tanba ohin Amu Jovito dehan lalaok sira kona-ba misa nian.
Tanba nee misa iha Tasi Tolu, PNTL sei organiza oinsa sarani sira bele tama ba iha neeba, oinsa mos transporte sira para.
“Tanba ita hatene kuandu la organiza transporte sira para arbiru deit, labele fo asesu ba populasaun atu hola parte iha misa nee,” dehan Ministru.
Governante nee dehan, ba kontribuisaun ba media importante tebes, iha Tasi Tolu sei halo transmisaun direita atu nunee sarani sira iha foho la konsege mai ou iha Dili laran rasik sira bele akompanha direita, tanba iha media internasional mos iha ona, tanba imi nia papel importante tebes atu halo kobertura serimonia misa funebre nee.
Nia informa, ba serimonia sira seluk orsida loraik sei remata prosesu ida fo omenajen ba iha livru neebé Nunciatura tau hela iha residensia Arsebispu nian, maibe iha Monumentu Nain Feto Lesidere sarani sira halo nafatin orasaun too Sabadu ba fali Tasi Tolu.
Tanba nee misa Funebre Amu Papa Francisco nia iha Tasi Tolu, husu ba sarani sira iha kamiza Amu Papa nian bele uza fali ba iha Tasi Tolu, nakloke, ida nee transmite ba publiku.
Nunee komisaun hamutuk ho Igreja, ami prepara nafatin kondisoes iha Tasi Tolu, ita bele halo prepara ba selebrasaun misa iha Tasi Tolu ho diak.
(joa)
