DILI, STLTIMORLESTE.com – Misa loron – loron nuudar devosaun ba sarani sira neebe iha tempu no laiha servisu ruma bele tuir misa, laos obrigasaun. Iha loron Domingu mak obrigasaun bá sarani hotu atu mai tuir misa, hodi nunee bele moris lo-loos tuir Nai Maromak nia ukun fuan.
Liafuan murak nee haktuir husi Pe. Selebrante Pe. Agustinho Soares, SDB bainhira prezide misa iha Igreja de Nossa Senhora de Gracas Tasi-Tolu, Domingu (15/02/2026).
Padre nee dehan, sekarik sarani sira iha tempu no laiha servisu ruma iha uma mai tuir misa loron-loron nian. Tanba misa loron-loron loron laos obrigasaun bá sarani hotu, maibe nuudar devosaun sarani sira nian ba Maromak. Misa iha loron Domingu mak importante bá sarani sira atu mai tuir misa. Basa Maromak haraik bá ema idak-idak tuir knaar, nuudar relijiozu Padre no Madre sira nia knaar mak reza no misa loron-loron, no hanesan sarani mos iha knaar neebe presiza atu halao iha moris loron-loron.
“Hanesan ami Amu no Madre sira, ami nia servisu mak reza no halo misa ba sarani hotu. Bá sarani sira neebe tuir misa loron-loron, nee laos obrigasaun maibe nuudar imi nia devosaun bá Nai Maromak. Misa bá loron Domingu nee mak obrigasaun atu sarani hotu mai tuir misa, tanba ida neemak moris lolos tuir maromak nia ukun fuan. Neebe moris nee idak-idak ho nia dalan,” dehan nia.
Padre nee fo ezemplu, bainhira inan ida hakarak tuir misa loron-loron, maibe husik tiha nia knaar nuudar inan no feen iha familia hodi la halo matabisu bá laen kaben atu bá servisu no oan sira bá eskola, ida nee atu dehan se mak sala iha nee. Tanba nee misa loron-loron laos obrigasaun maibe nuudar devosaun sarani sira bá Nai Maromak. Laiha servisu ruma iha uma no iha fatin servisu nian bele mai misa, hodi bele halo tuir moris diak nuudar sarani diak no tuir Maromak nia ukun fuan neebe lo-loos.
Leitura sira ohin konvida ema hotu atu moris tuir Nai Maromak nia ukun fuan. Moris tuir Maromak nia ukun fuan neebe hatudu liu husi hahalok no sai husi fuan neebe nakonu ho domin bá ema seluk.
Nia katak, moris labele hanesan rate neebe iha liur pinta didiak no kaber maibe iha nia laran nee dodok los. Moris tenke kumpri tuir lei neebe sai husi ema nia fuan no hatudu husi hahalok, ida nee mak Jesus hakarak hodi halo mudansa bá ema nia fuan, fuan neebe hatene terus no pasensia. Basa atu moris tuir Maromak Nia ukun fuan neebe lo-loos no hakarak haree lalehan tenke hasoru dezafiu neebe la para atu halo tuir iha moris nee, maibe sei la mesak tanba Maromak sei tuir nafatin.
“Neebe ita atu lao tuir Maromak Nia ukun fuan nee, ita tenke hasoru dezafiu barak-barak no la fasil, tanba atu hetan lalehan tenke moris tuir Maromak nia ukun fuan ho lo-loos no Maromak la husik ita mesak luta hasoru moris nee,” dehan Amu Agustinho.
Nia hatutan, iha esperiensia moris loron-loron atu hetan Maromak Nia grasa iha moris tenke reza ho pasiensia iha buat hotu-hotu. Reza no pasiensia sei hetan grasa Nai Maromak hodi hetan ksolok iha moris loron-loron. Ksolok lo-loos mak bainhira buka Maromak no Maromak hela iha ema idak-idak nia fuan. Ksolok nee laos haree deit husi ema ida nia matenek no riku soin mundu nian maibe ksolok lo-loos mak lao tuir Jesus neebe terus iha krus.
(dom)
