DILI, STLTIMORLESTE.com – Tinan 2024 liu ona no simu tinan foun 2025, ida nee presiza refleta tempu, no misteriu boot Maromak nian iha mundu nee mak domin, terus no susar.
Lia hirak nee hatoo husi Padre Heri Soares, SVD liu husi nia omilia Tersa kalan (31/12/2024) hatete, oras nee too ona iha tempu nia ninin. Tempu entre tinan tuan no tinan foun, tinan 2024 remata ona no tinan 2025 mai daudaun. Iha buat barak mak senti no simu. Ho buat hotu neebe ema iha, no iha deit lia-los ida neebe mak presiza refleta mak tempu.
“Umanu mak nuudar viatura ba tempu. Ita moris no hela iha tempu. Tinan 2024 sei ba no sei la fila tan. No sei simu kedas ho tinan 2025. Ita ema mai iha mundu, haree, hela no senti mundu ida nee ho tempu. Iha tempu ita hasoru malu. Iha tempu ita despede malu no iha mos tempu ita husik malu ka lakon ba malu. Iha tempu halo ida senti fuan moras iha tempu mos ita senti haksolok. Iha tempu neebe hafahe ita maibe mos iha tempu ba ita hodi fila ba malu. Iha tempu ita hadomi malu, iha tempu mos ita iha odiu ba malu,” dehan Padre nee.
Padre Heri hateten, husi lalaok moris hirak nee hotu, ema deskobre los duni katak iha buat importante rua neebe mak halo ema hakarak hodi koalia sai misteriu boot Maromak nian iha mundu nee mak domin, terus no susar.
Bibi Atan Kreda Katolika nee dehan, moris iha tempu ida nee. Tempu halo ema konhese no senti saida mak terus no susar. Hanoin ba terus no susar hanorin ita kona-ba domin. No domin halo ema konsiente kona-ba esperansa ba moris ema nian, nuudar humano da viatura do tempu, no fiar katak iha terus no susar sempre iha esperansa ida ba moris.
Padre hateten, iha minutu ikus tinan tuan nian. Iha Paí ida hakerek iha ninia diariu kona-ba sentimentu ninian ba nia kaben, too ona iha tempu nia ninin entre tinan tuan neebe liu ona no tinan foun neebe mos mai daudaun.
“Maibe hau senti katak tempu nee hanesan deit no la iha buat ida mak diferente. Iklima sira nafatin iha mudansa. Hau nia aan mos iha mudansa. Maibe tamba sa tempu nunka mais iha mudansa. Hau tenki konsiente katak hau laos ema neebe mak perfeitu, iha neebe hau deskobre katak hau hadomi o la soe o too mate hanesan iha ita nia Juramentu ikus iha momentu ita simu kazamentu. Hau hadomi o tanba domin hotu iha mundu nee hanesan bee neebe naksuli aan ba iha lihun lagoa ida neebe mak hanesan. Bee oan sira halibur hamutuk hodi sai ida deit neebe transforma aan ba udan hodi fo bensaun ba mundu, hau hadomi o hanesan mota neebe mak kria kondisaun sira ho klaru ba ai-horis, ai-funan sira hodi moris buras iha foho lolon sira. Hau hadomi o hanesan mota neebe fo bee ba sira neebe hamrook no lori sira ba iha dalan moris neebe mak sira atu ba,” dehan Padre.
Laen nee hatete ba feen katak hau hadomi o hanesan mota neebe hatene katak nia sei naksuli aan ba iha mota-oan sira ho diferente ho dalan oi-oin hodi ba deskansa iha fatin ikus nian. Hau hadomi o tanba ita moris iha fatin neebe hanesan, mai husi nia hun ida deit, tamba nee bee matan inan mai ita nunka mais atu maran. Tanba nee wainhira ita senti lakon vontade iha moris, ita nafatin koko hodi hein iha minutu sira moris nian. Iklima malirin sei fila mai, udan-been esperansa hakuak ita iha dader neebe ita hakdofak.
(eme)
