DILI, STLTIMORLESTE.com – Iha loron Tersa nee, Ministru Justisa (MJ), Sergio Hornai aprezenta orsamentu no mos proposta adisional.
“Ohin Ministeriu Justisa mai aprezenta tetu orsamentu no mos proposta adisional sira, konforme planu asaun anual sira neebe ita halo ona submisaun ba iha dalan ba futuru, iha programa prinsipal haat neebe ita define sai hanesan orientasaun prioridade iha setor justisa nian, liu-liu ba iha reforsa Estadu, hametin Estadu de direitu, atu halo servisu ida neebe diak, liu-liu asesu ba justisa, atu justisa bele ba ema hotu,” dehan Ministru Justisa, Sergio Hornai ba jornalista sira iha Ministeriu Finansas, Tersa (12/08/2025).
Nia hatete, bele halo mos lei restruturante balu atu reforsa sistema judisiariu nee rasik, tanba nee iha programa ba iha planu reforma setor justisa no ida kona-ba asesu justisa, iha servisu balu Defensor Publiku nian, oinsa atu garante no asegura servisu sira iha setor justisa.
“Iha asesu justisa nian ita halo mos politika kona-ba jestaun Terras no Propriedade, atu oinsa halo atribuisaun titulu ba ita nia sidadaun sira, no iha arendamentu nian politika ba iha jestaun terras no propriedade kona-ba dominiu privadu Estadu nian, sei halo atu asesu justisa bele lao ho diak,” nia informa.
Nia esplika, hatoo mos hanoin balu kona-ba MJ nia haree iha servisu operasional sira iha dezenvolvimentu instituisional, tanba dezenvolvimentu institusional hakarak servisu ida neebe lao permanente liu ba iha atendimentu pasaporte, rejistu moris, rejistu mate nian no mos rejistu kriminal, hakarak prosesu sira tenke lao lais, tenke ho planu ida atu halao servisu permanente iha Diresaun Jeral Servisu Rejistu Notariadu, ho nia orsamentu neebe natoon atu bele halo emisaun ba iha pasaporte sira no mos ba iha blanku no mos dokumentus ofisial sira seluk.
“Koalia mos kona-ba inkluzaun sosial katak, halao servisu ba sidadaun sira sem diskriminasaun, la haree ba nia feto ka mane, iha direitu hanesan tantu defisiente, atu iha tratamentu ida hanesan ba iha emisaun ba passaporte no mos iha emisaun ba BI no sertidaun, no aban bainrua haree kona-ba rekonhesimentu sira nia direitu kuandu sira hanesan herderu ba eransa ruma,” dehan MJ.
MJ dehan, seluk mak haree kona-ba PSIK sira mai aprezenta sira nia orsamentu, aprezenta mos adisional.
“Husi MJ nian tetu orsamentu foin lalais por volta US$ 10 milhoes ital iha tetu orsamentu, maibe iha tan adisional balu por volta US$ 6 milhoes, introduz dalan ba futuru nian iha US$ 4 milhoes,” dehan nia.
Ajustamentu neebe halo ikus mai proposta adisional no mos tetu orsamentu por volta US$ 6 milhoes, ida nee mak sira hatoo hele ba iha KRO.
Reseitas neebe MJ hetan husi pasaporte no arendamentu nian mos por volta US$ 5 milhoes ital atu besik US$ 6 milhoes ital iha tinan 2025 nian, fo hanoin mos katak se karik osan ida nee mantein sei halo servisu ida diak liu atu halo reseitas ba iha levantamentu iha distritu no mos Dili laran, oinsa bele atribui kona-ba titularidade ba sidadaun sira.
Nunee, osan adisional ajusta mos ba iha forsa de trabalho, tanba MJ iha Mil Duzentos e seis forsa de trabalho husi kargu xefia, funsionariu permanente, funsionariu kazuais no mos sira neebe goja rejime espesial, abrajen mos too iha 13 munisipiu atu sustenta ba iha salariu bem servisu.
Ni informa, iha kapital dezenvolvimentu halo deit reapropisaun orsamentu ba iha dezenhu no BOQ iha Weberek, atu halo reabilitasaun ba iha prizaun no mos Sentru Juvenil nian.
Iha fatin ketak, Akademiku UNTL, Sebastiao Dos Santos dehan, planu MJ nian tenke diak, atu nunee ba iha liu husi Diresaun Notariadu bele kontinua hatama reseitas ba Estadu.
“Hau hanoin planu neebe diak ba oin bele kontinua aumenta reseitas, hodi apoiu servisu balu neebe iha,” dehan nia.
(ter)
