DILI, STLTIMORLESTE.com – Ministru Justisa (MJ), Sergio Hornai hatoo parabens ba Juiz Afonso Carmona neebe hetan ona pose, hodi asumi kargu nuudar Prezidente Tribunal Rekursu (PTR.
Ministru Justisa, Sergio Hornai hatoo parabéns nee liu husi nia diskursu bainhira fo tomada de pose ba Inspetor Xefe Defensoria Publika iha sede Defensoria Publika Balide, Segunda (05/05/2025).
“Nai Prezidente Tribunal Rekursu Afonso Carmona ami hakarak felisita ita boot, parabens ba Timoroan ida neebe mai husi kareira tinan naruk tinan 23 fulan 9 loron 19 ita boot halao ita boot nia kareira profisional iha orgaun Tribunal Estadu nia, ita boot halo ezersisiu ida ke estraordinaria no parabens ba ita boot, lori Ministriu Justisa no IX Governu Konstitusional nia naran dezeza susesu ba iha ita boot ninia kareira, ita boot nia sabedoria hodi lidera ita nia orgaun Autoridade Justisa Timor Leste nia nuudar terseiru orgaun soberania Estadu,” katak Ministru Justisa.
Ministru Justisa hatete, Prezidente Tribunal Rekursu Afonso Carmona ema neebe halao kareira tinan 23 iha kareira profisional iha orgaun Tribunal Estadu nia neebe halao ezersisiu estraordinariu, tanba nee Ministru Justisa lori IX Governu Konstitusional nia naran hatoo felisitasaun no parabens tanba asumi kargu importante nuudar Prezidente Tribunal Rekursu.
Iha sorin seluk, Prezidente Republika Jose Ramos Horta liu husi nia diskursu hatete, durante nee Prezidente Tribunal Rekursu Afonso Carmona mos halao knaar tinan barak iha esperiensia diak tebes, tanba nee Prezidente Republika fo pose hodi asumi kargu nuudar Prezidente Tribunal Rekursu.
“Agradese tebes ba Prezidente Tribunal Rekursu Afonso Carmona nia prezensa, hanesan ohin Ministru Justisa hatete tinan hira nia laran servisu iha publiku ho esperiensia klean tebes konta ho ita boot, hanesan mos konta ho Ministru Justisa,” katak PR Horta.
Aleinde nee Prokurador Jeral Republika nia mandatu mos remata ona iha fulan Abril liu ba, iha informasaun katak Prezidente sei extende PJR nia mandatu informasaun nee los ka lae? Hatan ba kestaun nee Prezidente hatete, nia labele fo komentariu ba ida nee, maibe tuir Prezidente Republika nia haree PJR ema neebe diak, tanba nee mandatu remata sei trazita ba instituisaun estadu liu liu setor justisa nia.
“Nee hau labele komenta, hau hakarak hatete deit mak nee, PJR ema diak, kompetente, hau espera ke nia bele, depois tranzita ba instituisaun seluk neebe importante iha rai laran iha setor justisa nia, portantu kuandu remata iha tempu badak kumpri ona mandatu bele haree fatin seluk iha setor justisa maibe nee sei koalia ho Governu, Ministru Justisa, koalia ho PJR rasik saida mak sira bele halo kontribui ba justisa,” katak PR Horta.
Karik iha ona figura seluk troka PJR nia fatin? Hatan ba kestaun nee Prezidente Republika hatete, ohin mai koalia hodi espekula fali buat balun mos lalos.
(eme)
