DILI, STLTIMORLESTE.com – Ministru Justisa (MJ), Sergio Hornai hatete, MJ konklui ona levantamentu no relevantamentu ba iha suporadik hamutuk 922 parselas.
“Foin dadaun hau aprezenta iha Parlamentu Nasional (PN) fulan hirak nee ita konsege konklui levantamentu no re levantamentu ba iha suporadik ita iha por volta de novisentos e vinte dois (922) parselas, neebe sujeita final ba iha faze homologasaun atu publika iha Jornal da Republika, katak objeitu nee la iha ona problema halo konhesimentu ba titularidade,” dehan MJ, Sergio ba jornalista sira, iha Kaikoli, Dili, Kinta (23/10/2025).
Nia dehan, sei halo servisu nee fazeadamente ho neneik atu hatan ba iha proekupasaun komunidade nian, liu liu mos ba ajensia finanseira internasional no nasional Banku no sidadaun sira neebe iha proproetariu iha interese mos konaba, oinsa atu hetan sira nia sertifikadu kona-ba direitu propriedade.
Tanba foin lalais fulan Setembru ba kotuk halo submisaun proposta ida nuudar dekretu lei, neebe regulariza kona-ba rejime juridiku dominiu privadu Estadu no mos rejime juridiku ba iha publiku Estadu nian.
No rejime ida nee hetan ona promulgasaun husi Prezidente Republika iha loron 14 liu ba no publika ona iha Jornal da Republika, agora komesa tau ba iha implementasaun ba iha natureza ka kontinuidade ba iha dekretu lei numeru 36/2025 foin dadaun iha fulan Outubru promulga ona.
Nunee bele tulun lei estruturante sira seluk neebe koalia kona-ba rai liu liu lei numeru 1/2003 no mos lei numeru 13/2017 kona-ba rejime juridiku titularidade ba bens no moves ninian, no mos ba lei espropresaun numeru 8/2017 neebe koalia konaba oinsa halo esproreisaun ba iha rai privadu.
Maibe kuandu iha atividade alargamentu ba dezenvolvimentu Estadu ba interese komun, karik afeta ba ema nia rai privadu ruma. No iha mos lei estruturante no dekretu balu koalia konaba, informasaun kadastral no lei numeru 13 atu haree oinsa maka Ministeriu Justisa (MJ) halo ona rekonhesimentu.
Iha fatin ketak, Komunidade Suku Komoro, Romerio Maria dehan, importante duni iha dekretu ida atu regularize, kona-ba dominiu sira neebe iha.
“Hanoin importante duni iha dekretu ida atu nunee bele regulariza konaba dominiu sira nee, tanba se koalia deit la forsa ho dekretu balu maka bele haforsa servisu neebe iha bele lao ho diak,” dehan nia.
Komunidade nee husu, atu publiku hotu atu hakruk ba dekretu neebe iha, atu kopera ho parte relevante sira, hodi apoiu sira nia servisu bele lao ho diak, hodi dominiu neebe estadu nian labele okupa arbiru.
Jornalista: Terezinha De Deus
Editora: Carme Ximenes
