DILI, STLTIMORLESTE.com – Governu liu husi Ministeriu Justisa (MJ) daudaun nee kontinua halo levantementu titulu ba rai iha munisipiu tolu mak hanesan Lautem, Vikeke no Baukau.
“Ita nia propsesu sira lao hela, ekipa halo hela levantementu, oinsa atu halo negosiasaun no atribuisaun ba parsela sira iha parte Leste ninian, sira lao hela. Teknika balun hamutuk ho Sekretariu Estadu halo hela servisu balun iha parte Leste, iha Munisipiu Lautem, Vikeke no Baukau,” dehan Ministru Justisa (MJ), Sergio da Costa Hornai, hafoin partisipa iha reuniaun Konselhu Ministru (KM) iha Palasiu Governu, Kuarta (02/04/2025).
Governante nee mos hateten, daudaun nee Governu sei halo, atu nunee bele tinan ida nee atinji tarjetu neebe mak iha, bele too 500 ital, hodi halo atribuisaun titulu ba rai.
Nia afirma, tinan ida nee iha progresu ida neebe mak makaas loos, husi levantementu hirak nee, atu nunee halo verifikasaun ba dokumentus hotu neebe mak iha, relasiona ba dokumentu atribuisaun titularidade nian, tanba nee iha ezersisiu levantamentu nee fundamentu tuir lei diresaun terras no propriedades artigu 13/2017.
“em prisipiu neebe iha, tuir ita nia lei 13/2017, Diresaun Terras no Propriedades halo hela ezersisiu ba levantementu no ita husu ba komunidade hotu-hotu neebe karik ita nia ekipa tun halo relevantementu ou halo konfirmasaun ba dadus sira neebe bazeia ba lista sira neebe mak iha terras proriedades atu kontribui,” hateten ministru.
Ministru Justisa mos husu nafatin ba komunidade neebe iha interese duni ba iha levantementu titulu ba rai atu bele kolabora hodi rejista sira nia linhas popriedade refere, bazeia ba rekezitus neebe forma tiha ona husi Komisaun Terras Propriedade neebe halo iha munisipiu, hodi rejistu ba iha benefisiariu sira neebe mak hetan direitu ba iha titulu ba rai.
Antes nee, iha ambitu selebrasaun loron Proklamasaun Unilateral Independensia TL, 28 Novembru 2024, ba dala 49 iha kampu isar Bandeira Nasional 5 de Maiu Palaban Rejiaun Administrativa Espesial Oekusi-Ambeno, Governu liu husi MJ ho Sekretariu Rejional Teras Propriedade no Servisu Cadastro konsege atribui ona sertifikadu titulu ba rai ba povu Oekusi oan neebe partensia iha Suku Costa, Postu Administrativu Pantemasar, Rejiaun Admiistrativa Espesial Oekusi-Ambeno (RAEOA).
(jos/EST 3)
