DILI, STLTIMORLESTE.com – Governu liu Ministeriu Justisa (MJ) presiza estabelese lalais sentru juvenil, nunee bele akomula labarik ho idade menor neebe komete krime hodi bele fo formasaun ba sira.
Akademista Judite Dias Ximenes ba jornalista STL iha nia knaar fatin Kaikoli, kuarta nee (07/01/2026) hatete, presiza aselera lalais sentru juvenil nunee sai fatin formasaun ba labarik neebe ho idade menor neebe komete krime.
Akademista husi UNTL nee dehan, maske antes nee Ministru rasik deklara ona maibe too oras nee seidauk harii sentru nee tanba saida? Karik orsamentu mak seidauk iha ka oinsa, no sentru juvenil laos sai hanesan komarka ida maibe hanesan fatin formasaun ba labarik sira.
“Sentru Juvenil nee fatin hanesan formasaun, aprende lingua no halo refleksaun nunee bele muda hahalok la diak sira, nunee labarik nee ho idade kiik labele ba hamutuk fali ema neebe ho idade boot iha komarka, tanba nee Ministeriu Justisa presiza aselera lalais sentru nee ba labarik sira” dehan nia.
Nunee mos Vise Diretor Asosiasaun Hak, Antonino de Limas hatete, husu Ministru Justisa, Sergio Hornai atu prosesa lalais sentru Juvenil, tanba kazu barak neebe envolve labarik minoridade, sentru nee nuudar espasu ida neebe fo formasaun komplentar bele hadia komportamentu labarik sira nian.
Vise Diretor sei lembra uluk Asosiasaun HAK organiza workshop ida konvida Ministru Justisa rasik partisipa, ministru promete estabelese duni sentru Juvenil.
Nia haktuir tan katak, tuir informasaun ikus iha kestaun tekniku kona-ba rai neebe iha Tibar nee husi Ministru Justisa koalia ona oinsa estatutu rai, oinsa atu harii.
“Agora ita la hatene, uluk hatete iha orsamentu atu konstrui duni sentru Juvenil nee, maibe se laiha nafatin. Ita husu ba Ministru Justisa atu prosesa lalais sentru Juvenil nee, tanba ita hatene kazu barak neebe envolve labarik menoridade sira barak tebes, sira barak mak hela iha prizaun Bekora, espasu mos ladun diak ba sira,” dehan Vise Direitor.
Nia haktuir tan katak, loloos labarik kiik neebe komete krime tenke tratamentu iha fatin seluk, labele hamutuk ho sira neebe hetan ona pena prizaun hanesan iha Bekora nee.
Antes nee Ministru Justisa, Sergio Hornai hatete, sentru Juvenil iha ikus liu iha ona Komisaun Nasional Aprovizionamentu (CNA), ekipa halo hela servisu.
“Teknikamente hanesan hau temi fila-fila, dala ruma ita boot sira mos ansiozu la halimar, maibe hau hakarak hatete, hanesan ministru, hau mos halo servisu tekniku neebe kleur, entaun hau hatene katak, iha prosesu birokratiku oituan, mais ita hakarak asegura buat ida seguransa juridiku ida nunee buat sira nee lao tuir ita nia tramitus legais, entaun kestaun administrativa, mais buat neebe hau hanesan governante, hau propoin iha planu, tau iha orsamentu,” dehan nia.
Nia dehan, mais sempre kestaun tekniku sira iha aprovizionamentu nee bele iha ministeriu, mais bainhira ba ona iha CNA konforme rejime juridiku aprovizionamentu ninian define iha neeba, tenke sujeita ba iha neeba.
Aleinde nee, orsamentu neebe governu prevee ba estabelesimentu sentru Juvenil nee hamutuk rihun atus rua resin.
Jornalista: Emerenciana Pinto
