DILI, STLTIMORLESTE.com – Ministru Justisa (MJ), Sergio Hornai hatete, kandidatu neebe la pasa ba iha faze estajiu, se hatama rekursu ba Ministru Justisa mak Ministru sei haree hodi fo resposta ba rekursu nee.
Nia dehan, prosesu sira lao hela iha Ministru nia meza, no Ministru akompanha hela, maibe Ministru sei koalia, dentru de dokumentu kuandu iha ona nia meza sei haree.
“Se rekursu hirarkiku nee aprezenta mai iha Ministeriu Justisa, konserteza hau sei fo resposta ba rekursu neebe tama mai,” dehan MJ, Sergio ba jornalista sira iha Kaikoli, Dili, Kinta (04/09/2025).
Hatan kona-ba kandidatu nee posibilidade atu tama fali ka lae, nia dehan labele halo lai espekulasaun, tenke apura didiak faktus nee saida, no provas nee oinsa , tanba Instituisaun propriu bele iha desizaun propriu, hodi halo ba kandidatu nee atu kontinua ba formasaun.
Nia hatutan, sira hamutuk nain rua nulu resin haat (24) mak ba iha Portugal, iha sira nain 23 depois de troka informasaun no mos nota sira neebe akompanha husi formador sira iha Portugal no Timor Leste.
Nunee, Sentru Formasaun Juridiku no Judisiariu (SFJJ) halo ona desizaun propriu ba iha setimu kursu Majistradu, Juiz, Prokurador no Defensor tuir informasaun neebe iha kandidatu ida maka la hetan admisibilidade atu pasa ba iha faze estajiu nian.
Iha fatin ketak, Prezidente Tribunal Rekursu, Afonso Carmona dehan, relatoriu tama iha Tribunal Rekursu (TR) iha naran kandidatu nain 12 deit.
“Relatoriu tama tiha ona temi nain 12 deit, ema formasaun kompetensia formasaun nian ita labele hatene, so desde inisiu ita envolve karik ita dehan ita nia ema lakon, agora Sentru Formasaun no Ministeriu Justisa nia kompetensia, tanba nee ita seidauk to neeba, prosesu lao hela ita sei akompana hela situasaun sira nee la hatene problema saida, “dehan Prezidente Tribunal Rekursu, Afonso.
Nia dehan, kandidatu Juiz sira nain 13 maibe to agora seidauk simu konaba ida seluk, maibe rona dehan nia iha Sentru Formasaun iha failansu tekniku uitoan, maibe nia buka hela solusaun halo hela rekursu kona-ba desizaun husi Sentru nian, no PTR nia parte labele hatene to iha neeba.
Aleinde nee, Diretora Sentru Formasaun Juridiku no Judisiariu, Marcelina Tilman da Silva hatete, sira hamutuk 24 neebe maka tuir formasaun faze pratika iha Portugal husi Janeiru too iha Junhu, sira remata ona formasaun pratika nian, sira iha ona Timor hein hela sira nia nomeasaun ba sai Juiz estajiadu, Prokurador estajiadu no mos Defensor Publiku estajiadu, no sira remata faze pratika iha loron 30 fulan Junhu.
“Agora sira nia rezultadu husi Sentru Estudu Portugal haruka ona mai, ami simu iha loron 30 fulan Jullu, konvoka enkontru pedagojiku hodi aprova sira nia rezultadu final neebe iha neeba haruka mai, rezultadu neebe sira 24 nee Juiz 13, Prokurador nain hitu, no Defensor nain haat, sira hamutuk 24 nee husi Juiz nain ida maka la liu hodi passa ba iha faze estajiu,” dehan nia.
Jornalista: Terezinha De Deus
Editora: Carme Ximenes
