DILI, STLTIMORLESTE.com – Ministeriu Justisa (MJ) solusiona makina neebe mak avaria hodi re-estabelesimentu atendimentu ba Print Sertifikadu Titulu nian.
Ministru Justisa, Sergio Da Costa Hornai hatete, daudaun nee Governu komesa re-estabelese fali ona, ekipa sira hahu halo atendimentu, maibe sei iha preokupasaun ba ahi eletrisidade neebe mak mate lakan.
“Ita nia makina diak, ita komesa re-estabelese fila fali, agora daudaun ekipa servisu hela tuir sistema neebe mak iha, maibe preokupasaun ita nia konserteja iha nafatin ba iha linha eletrisidade, mais ita konsege ultrapasa situasaun nee,” hateten Ministru Justisa, Sergio da Costa Hornai, hafoin partisipa iha reuniaun Konselhu Ministru (KM) iha Palasiu Governu, Kuarta (02/04/2025).
Nia afirma katak, makina funsiona maibe presiza eletrisidade bele lakan 24 oras, atu makina nee bele funsiona hodi bele preserve ho situasaun hirak nee.
“Ita boot sira hatene muito bem, ita presiza eletrisidade bele lakan 24 oras, atu makina nee bele funsiona hodi preserve ho situasaun hirak nee.
Iha biban nee, Ministru Justisa, Sergio da Costa Hornai fo nafatin mensajen ba iha komunidade sira atu bele partisipa, kolabora no kontribui ba iha nee, hahu fazeadamente hodi konlui servisu nee, tanba nee rekursu hotu sei garante direitu sidadaun sira nian.
“Governu hahu ho fazeadamente neebe mak besik, atu halo konluizasaun inklui bazeia mos ba iha kapasidade Governu nian, nunee iha rekursu hotu neebe mak Governu iha, hodi bele garante direitu sidadaun sira nian,” afirma Ministru Justisa liu husi ninia mensajen ba publiku.
Nia dehan, Governu nafatin halo esforsu mais posivel, atu nunee bele kria forma ida lo-loos ba sidadaun sira neebe mak merese atu hetan rejistu ka sai hanesan reklamasaun, nunee Governu bele prosesa, hodi nunee bele konsede ba iha sira nia titulu ba sertifikadu sira.
Antes nee Diretor Rejional Konservatoriu no Notariadu Rejiaun Administrativa Espesial Oekusi-Ambeno (RAEOA), Rui Pereira informa katak, sistema neebe falha iha Konservatoriu Nasional implika servisu konservatoriu Oekusi, labele print dokumentus hanesan Sertidaun Batizmu, Sertidaun Kazamentu, Sertidauk Bom Komportamentu no Bilhete Identidade, so funsiona deit mak pasaporte.
(jos)
