DILI, STLTIMORLESTE.com – Ministeriu Juventude Desportu Arte no Kultura (MJDAC – sigla portugues) liu husi Koordenador Jeral Jogu CPLP, atual Sekretariu Estadu Arte no Kultura, Jorge Soares Cristovão, ohin asina Memorandum of Understanding (MoU) ho Radio Televizaun Timor Leste, Empreza publiku (RTTL.EP) hodi halo transmisaun direita ba jogu CPLP neebe sei realiza iha loron 17-27 Julhu tinan nee.
Akordu nee asina husi MJDAC liu husi Koordenador Jeral Jogu CPLP atual Sekretariu Estadu Arte Cultura (SEAK), Jorge Soares Cristovão ho Prezidente RTTL.EP, Elizeu Isaac Fernandes neebe mak halao iha Sentru Konvensaun Dili, Segunda (07/07/2025).
Koordenador Jeral Jogu CPLP atual Sekretariu Estadu Arte no Kultura (SEAK), Jorge Soares Cristovão hateten, Governu hili RTTL.EP hodi halo trasmisaun direita ba jogu CPLP, tanba nuudar empreza ida neebe hetan finansiamentu mos husi Estadu.
“Ita hotu hatene RTTL iha ona esperiensia oinsa halo jestaun ba media senter hodi kanaliza out put ba media sira, tantu media nasional no internasional, RTTL konsege halo ona live streaming neebe mak diak, ho ida nee mak deside hodi hili media ida deit, esperiensia iha vizita Sua Santidade Papa Francisco mai vizita TimorLeste, laos kestaun seluk katak media sira seluk laiha kapasidade, maibe parseiru husi estadu ba governu ida nee mak ita deside hili RTTL”, dehan Jorge Soares.
Nia dehan, maske iha kondisoes no fasilidade la hanesan ho eventu internasional sira neebe mak ba jogu mundial ou jogu sira seluk, maibe pelumenus transmite ba sosiedade katak ida nee mak atividade neebe lao hela no ohin formaliza ba asina ida nee, tekniku barak sira lao tiha ona nunee loron hirak liu ba sira halo play out ka koko ekipamentus neebe mak sira iha.
Nia subluna, iha orsamentu hamutuk rihun US$ 50 neebe mak governu tau ba iha RTTL, nunee RTTL apoiu ba servisu ida nee, aleinde nee mos atu haree ba servisu ekipa tekniku sira husi parte RTTL nia.
“Hahu husi dia 17 too dia 27 Julhu ita fiar katak jornalista sira mos sei la toba, tanba nee mak husi akordu ho breves husi orsamentu neebe mak ohin temi para sira bele halo jestaun hodi estabelese kustu operasaun balun ba ita nia ekipa hotu,” katak nia
Iha fatin hanesan, Prezidente RTTL.EP, Elizeu Isaac Fernandes hatete, RTTL primeira vez hetan konfiansa ida husi Estadu atraves de komisaun organizadora ba jogu CPLP, hodi halo trasmisaun direita ba eventu ida nee iha semana oin mai.
“Atu hatoo ba ita hotu katak teknikamente RTTL 100% prontu no preparadu ona, no ekipa sira hotu komisaun neebe mak tutela hodi halo komunikasaun ho parte hotu-hotu,” katak Elizeu.
Nunee RTTL mos hetan ajudu husi entidades internasional sira hanesan ABC.ID, tamba nee atu hatoo ba publiku sira hotu katak, ba eventu CPLP neebe mak atu mai, haree ba parte broadcasting ninia, RTTL prontu atu bele fo transmisaun direita ba eventu ho modalidade neebe mak sei realiza iha eventu ida nee.
Nia afirma, RTTL mos sei fasilita media sira seluk atu bele hetan out put hodi bele fornese informasaun ba komunidade hotu liu husi idak-idak ninia kanais, tanba nee mak ba media internasional sira mos iha partisipasaun masimu ba eventu ida nee.
“Atu hatoo ba ita hotu no mos ba Estadu TL, SEAK no komisaun hotu katak RTTL liu ona prosesu lubuk ida halo try out ba iha jogu balun neebe mak oras nee lao hela iha ita nia rai ho akonpanhamentu tekniku internasionais sira hein deit jogu nee sei mai sei hatudu nia profisionalizmu no responsabilidade ba konfiansa neebe mak Governu Timor Leste liu husi komisaun organizadora entrega mai ami,” hakotu nia.
EST 1
