BAUKAU, STLTIMORLESTE.com – Governu liu husi Ministeriu Juventude Desportu Arte no Kultura (MJDAK) aloka orsamentu hamutuk US$ 5.300,00 ba selebrasaun loron nasional juventude ba dala 20 no komemorasaun masakre santa kruz ba dala 34 iha Munisipiu Baukau.
Diretor Ezekutivu Sentru Juventude Munisipiu Baukau, Manuel de Carvalho Marques esplika, ligadu selebrasaun loron nasional juventude ba dala 20 no komemorasaun masakre santa kruz ba dala 34, MJDAK aloka orsamentu liu rihun US$ 5 liu husi Sentru Juventude Munisipiu Baukau (CJMB), neebe sei aloka ba Komisaun Organizadora sira iha Postu Administrativu sira iha Munisipiu Baukau hodi selebra loron refere.
“Munisipiu Baukau iha Postu 8 entaun kada Postu Sentru Juventude liga ho mata dalan MJDAK nian katak dala Postu US$ 600.00, liga ho orsamentu neebe iha Komisaun Organizadora sira iha Postu 7 nia atividade diferente oituan ho Postu Baukau Vila atividade neebe sira atu organiza mak hanesan limpeza jeral, seminariu, kalan reflesaun, foka filmajen trajedia masakre santa kruz depois sei iha misa loro aifunan no lilin ba semiteriu,” Manuel hateten ba STL, iha knaar fatin Uatulete, Vila Nova, Baukau, Kuarta (05/11/2025).
Nia sublina, selebrasaun loron refere iha Munisipiu Baukau Postu Administrativu sira hanesan Kelikai, Matebian, Baguia, Laga, Kelikai Antigu, Venilale no Vemasi sei realiza atividade tuir planu Komisaun Organizadora Postu nian hahu husi limpeza jeral, seminariu, reflesaun kalan, loke filmajen trajedia masakre santa kruz nian hafoin remata ho misa kari aifunan no sunu lilin iha semiteriu publiku neebe Komisaun Organizadora sira iha nivel Postu identifika ona.
Enkuantu selebrasaun loron refere iha Postu Administrativu Baukau Vila atividade hanesan mos ho Postu Administrativu 7 seluk, maibe iha diferente, tanba sei aumenta ho atividade palku animasaun muzika no drama inklui loke feira hodi amina komunidade sira, maibe estimasaun orsamentu ba atividade iha Postu Baukau Vila la sufisiente, tanba nee Sentru Juventude submete ona proposta ba Autoridade Munisipiu Baukau liu husi Sekretaria Munisipal Asuntu Sosial atu apoiu orsamentu hodi realiza atividade sira iha Postu Baukau Vila.
“Ba Postu Baukau Vila ita koko halo atividade boot mezmu ita nia orsamentu labele kobre, ho nunee Sentru Juventude Munisipiu Baukau submete hela proposta ba Autoridade Munisipiu Baukau liu husi ASEO komfirmadu ona sei apoiu US$ 2000 hanesan nee,” Manuel fundamenta.
Liga asuntu nee jornalista STL tenta komfirma Sekretaria Munisipal Asuntu Sosial, Maria Celestina Viegas iha nia knaar fatin, maibe la fo komentariu ruma.
Entretantu atividade loke feira, animasaun palku muzika no drama sei realiza iha resintu edifisiu Administrasaun Autoridade Munisipiu Baukau iha loron 12 Novembru 2025.
Jornalista: Tomas Reis
Editora: Carme Ximenes
