BAUKAU, STLTIMORLESTE.com – Ministeriu Juventude Desportu Arte no Kultura (MJDAK) lansa kampanha nasional kultura iha Munisipiu Baukau, neebe planu ona atu prezerva istoria kultural Baukau.
Diretor Nasional Patrimoniu Kultura, Manuel Ximenes Smith esplika, programa kampanha nasional ba kultural nuudar programa husi Ministeriu Juventude Desportu Arte no Kultura neebe kada tinan kobre munisipiu sira, objetivu buka tuir informasaun kultural neebe beala sira husik hela ba kada lia nain iha munisipiu sira.
Nunee Ministeriu Juventude Desportu Arte no Kultura iha komitmentu kobre munisipiu sira liu husi lansa kampanha nasional kultura iha nivel munisipiu sira inklui Baukau, objetivu atu rona istoria Baukau husi lia nain sira.
“Hakarak ga lakohi katuas lia nain sira labele rai deit istoria, hakarak ga lakohi kontinua tramisaun ba jerasaun foun sira atu bele haree prosesu sustentabilidade ba iha prezervasaun ita nia eransa kultura neebe mak neste momentu istoria Baukau ema barak la hatene, jerasaun foun hatene mak Baukau deit, presiza ita explora ba uma lisan sira husu katuas lia nain sira nia kontribuisaun loke istoria ba jerasaun foun sira atu banati tuir,” hateten Manuel ba jornalista sira iha Vila Antiga Baukau, Tersa (08/07/2025).
Nia sublina, programa kampanha nasional kultura iha Baukau durante loron tolu hahu husi loron 07-09 Julhu nee, neebe iha loron dahuluk realiza iha Suku Bahu, Postu Administrativu Baukau Vila, rona istoria direita husi lia nain sira iha Baukau kona-ba istoria Baukau nian, tanba Suku Bahu nuudar Suku Antigu iha Baukau laran.
Enkuantu loron rua ikus realiza iha salaun Sentru Konvensoens Vila Antiga neebe hetan partisipasaun masimu husi lia nain sira iha nivel Postu Administrativu Ualu neebe konta istoria kultural Baukau nian ho lo-loos no momos.
“Fulan oin hau sei haruka hau nia ekipa tekniku mai loron 5 iha nee atu haree kona-ba dokumentasaun eransa kultural iha Baukau laran, ikus liu ita produz livru atu bele sosializa ba komunidade enjeral bele intende istoria munisipiu nian,” Manuel akresenta.
Direitu nee fundamenta, iha fulan oin sei orienta ekipa nasional halo levantamentu kona-ba eransa kultural nian iha Munisipiu Baukau inklui Munisipiu Manatuto no Lautem hafoin produz livru no sosializa hikas ba komunidade sira nunee bele intende istoria sira husi munisipiu refere.
Aleinde mos produz livru kona-ba eransa kultural sei prezerva nunee vale ba jerasaun foun sira tuir mai hodi kontinua valoriza kultura Timor nian.
Prezidente Autoridade Munisipiu Baukau, Veneranda Lemos konsidera, programa kampanha nasional kultura neebe lansa iha Munisipiu Baukau importante tebes, tanba bele fo hanoin hikas ba jerasaun foun sira hatene istoria kultural Timor nian liu liu kultura Baukau.
Nunee agradese ba ekipa Ministeriu Juventude Desportu Arte no Kultura neebe iha planu atu haburas kultura Timor nian.
“Agrasede ba Arte no Kultura ho nia komponente tomak neebe la para luta nafatin haburas ita nia kultura, ita nia lisan neebe ita rona rasik husi Diretor Nasional, fahe oinsa ita atu prezerva, preokupasaun boot, tanba ita moris iha dekadas oin-oin, liu-liu joven sira,” hateten Veneranda.
Partisipante Filomeno Bruno sente kontente no konsidera programa refere importante tebes, tanba bele fanu sidadaun sira atu hatene nia orijinalidade no identidade.
“Rezumu badak hau foti husi neeba mak oinsa atu prezerva ita nia identidade kultural promove no oinsa ita atu eleva kualidade evolusaun mundu ohin loron nian, se ita la prezerva ba jerasaun aban bainrua mai sei dominadu ho maneira oin-oin,” katak Bruno.
Habitante Suku Bahu nee husu ekipa Ministeriu Juventude Desportu Arte no Kultura atu kontinua promove kultural Timor nian no prezerva istoria kultural Timor nian nunee sai materia ba jerasaun foun sira tuir mai hodi tane nafatin kultura Timor nian, tanba mundu ohin loron ameasa kultura Timor nian liu husi maneira oin-oin.
Entretantu Programa Nasional Kultura nee realiza iha salaun Sentru Konvensoens Vila Antiga Baukau neebe hetan partisipasaun masimu husi Autoridade Sivil no Militares inklui lia nain sira husi Postu Administrativu ualu no estudante balun.
(tom)
