BAUKAU, STLTIMORLESTE.com – Ministeriu Komersiu no Industria (MKI) liu husi Diresaun Nasional Peskiza Estatistika aprezenta programa Postu ida Produtu ida ba entidades sira iha Munisipiu Baukau.
Diretora Nasional Peskiza Estatistika, Maria Lúcia Trindade hateten, mandatu Nonu Governu Konstitusional iha papel importante ida mak kona-ba asuntu ekonomika, tanba Timor Leste eziste hanesan nasaun ida, maibe sei dependensia ba produtu importadu sira, nunee programa refere objetivu atu fanu entidade sira identifika produtu potensial sira iha Timor Leste hodi reduz produtu importadu.
“Ohin ami mai atu aprezenta konseitu ida kona-ba Postu ida Produtu ida, objetivu aprezenta konseitu nee oinsa ita identifika ita nia produtu sira neebe kategoria uniku iha kada atu nunee bele dezenvolve asesu ba merkadu nasional nomos global,” hateten Maria Lúcia ba jornalista sira hafoin ensera aprezenta programa PiPi iha salaun apuramentu Munisipiu Baukau, Tersa (29/07/2025).
Nia sublina, implementasaun programa Postu ida produtu ida husi nasional too nivel Postu Administrativu neebe sei servisu institusionaliza integradu hodi identifika produtu ida neebe iha potensialidade bele asesu merkadu, maibe haree husi produtu nia kualidade, kuantidade no kontinuidade.
Nia fundamenta, programa Postu ida produtu ida nee rasik parte MKI tarjetu ba munisipiu 10 iha teritoriu nasional atu aprezenta ba entidades sira hafoin hakat ba faze identifikasaun produtu sira iha nivel Postu Administrativu hafoin implementa, tanba husi prosesu identifikasaun mak sei halo analiza produtu ida iha postu ida.
“Ita haree produtu agora daudaun hanesan Kafe, Masin no Maek sira nee halo ona exportasaun, maibe agora ita fo prioridade ba produtu sira neebe iha kapasidade produsaun nomos haree permintaan merkadu nee para ita lori ba merkadu,” Maria Lúcia akresenta.
Diretora nee deklara, aprezenta programa Postu ida produtu ida iha Baukau hatudu rezultadu diak, tanba hetan opinioes sira husi entidades partisipante sira fo hanoin ba MKI tetu molok lansa programa postu ida produtuida.
Enkuantu Administradora Postu Administrativu Vemasi, Elda Maria Viegas de Sousa Freitas konsidera, programa PiPi importante tebes ba Postu Vemasi, tanba bele akumula ona Suku hotu iha nivel Postu ida ba produtu ida, maibe prezisa mos halo identifikasaun klean, tanba Postu ida iha Suku barak neebe produtu la hanesan, maibe espera liu husi programa postu ida produtu ida bele difini ona produtu ida hodi futuru bele sai fatin turizmu ba produtu ida iha kada Postu Administrativu.
“Hau hanoin katak, ba futuru mai laos hanoin atu faan deit, maibe ita espera katak husi programa ida nee bele kria mos fatin turizmu ida, vizitante sira bele ba rasik haree, kuu rasik no sente rasik,” Katak Elda.
Nia informa, Postu Administrativu Vemasi potensial ba setor rua, ida agrikultura no hortikultura, nunee prezisa halo indentifikasaun, maibe diak liu Suku ida Produtu ida nunee komunidade sira bele esforsu difini produtu ida sai identidade ba Suku ida.
Entretantu aprezenta programa Postu ida produtu ida nee realiza iha salaun apuramentu Munisipiu Baukau neebe hetan partisipasaun masimu husi diretores linha ministerial destaka iha Baukau inklui Administrador Postu sira.
(tom)
