DILI, STLTIMORLESTE.com – Ministru Komersiu Indutria (MKI), Nino Pereira hatoo parabens ba povu Timor Leste, liu-liu joven sira neebe hatudu sentidu pas no harmonia iha selebrasaun festa Natal neebe liu daudaun.
MKI, Nino Pereira hatoo lia hirak nee ba jornalista sira iha Palasiu Prezidensial, Nicolau Loabto, Bairo Pite, Dili, Sesta (27/12/2024).
Nia dehan, Natal liu daudaun ona, situasaun hotu lao hakmatek, tanba povu no joven sira hatudu ona sentidu sai hanesan autor ba pas no unidade.
“Tinan ida nee pasa Natal ho dame no hakmatek unidade, liu-liu mak ita nia joven sira iha bairu bairu kontinua hakmatek, kolabora ho autoridade sira, hau hanoin ida nee mak importante, tanba ita hotu hanoin katak ho ita Nain Jesus Kristu moris, moris iha simplisidade hakmatek nia laran, tanba nee mak ita presiza duni halo reflesaun ida ho sentidu ida katak, ita hotu bele sai hanesan autor ba pas no unidade nia, neebe ho tempu ida Natal hanesan nee hau hanoin tempu ba familia hotu-hotu, liu-liu ba joven sira bele kontribui realmente saida mak hatudu iha tempu Natal neebe ita apresia no parabens ba joven no komunidade sira,” dehan MKI, Nino.
Membru Governu nee mos ho esperansa katak, ho tinan foun 2025 Governu neebe mak lidera husi Primeiru Ministru, Kay Rala Xanana Gusmão bele halo buat diak tan ba rai doben ida nee.
Tanba joven sira mantein pas no estabilidade, nunee selebrasaun festa Anu Novu mos bele lao hakmatek nafatin hanesan saida mak joven no povu hatudu ona iha Natal neebe mak liu daudaun ona.
(eme)
