BAUKAU, STLTIMORLESTE.com – Ministeriu Komersiu no Industria (MKI) liu husi Institutu Nasional Administrasaun Publiku (INAP) kapasita funsionariu hamutuk nain 25 husi Servisu Munisipal sira ba area Jestaun Eskritoriu nian iha Munisipiu Baukau.
“Diresaun Rekursu Umanus MKI realiza formasaun iha Munisipiu Baukau ho tema Jestaun Eskritoriu atu kapasita no eleva sira nia konhesimentu ba atendimentu publiku nian, no formasaun ida nee ministeriu servisu hamutuk ho INAP,” hateten Diretor Nasional Rekursu Umanus MKI, Jorge Ferreira ba jornalista sira hafoin remata abertura iha Vila Nova, Baukau Segunda (12/05/2025)
Diretor nee esplika, formasaun nee realiza bazeia ba lei organiku Ministeriu Komersiu no Industria numeru 72 iha artigu 14, neebe fo kompentensia ba Diresaun Nasional Rekursu Umanus halo Jestaun ba Rekursu Umanus hotu iha territoriu nasional liu husi koordenasaun no fo kapasitasaun ba funsionariu sira neebe haknaar aan iha MKI Servisu Munisipal sira.
Nunee liu husi formasaun nee atu eleva konhesimentu funsionariu sira nian hodi atende sidadaun sira ba iha atendimentu publiku diak liu tan, tanba daudaun akontese funsionariu sira atende sidadaun sira neebe trata dokumentu ba lisensiamentu nian seidauk iha maneira neebe diak atu atende.
“MKI importante iha Nasaun RDTL, tanba atendimentu publiku liu-liu ba lisensiamentu, ita Timor dala ruma iha falhansu atendimentu, hasee ema oin boot, seidauk hasee ema oin midar, tanba nee mak liu husi formasaun ida nee ita bele muda ema nia hanoin,” Jorge Ferreira akresenta.
Diretor nee argumentu, liu husi formasaun nee bele muda pensametu funsionariu sira nian ba atendimentu publiku, tanba iha materia importante lima hodi kapasita funsionariu sira.
Nia esplika, materia lima mak hanesan hakerek karta ofisial, atendimentu publiku, meius komunikasaun ba kliente sira no seluk tan neebe relevante ho servisu Ministeriu Komersiu no Industria nian hodi fo benefisiu ba instituisaun Estadu.
“Esperansa katak, depois formasaun remata funsionariu sira bele muda atendimentu, labele hanesan nafatin hanesan uluk, maibe formasaun nee remata sira sei iha mudansa,” Jorge Ferreira espresa.
Reprezentante partisipante sira, Mardiana Natalia da Costa agradese ba Ministeriu Komersiu no Industria, tanba bele fasilita formasaun ba sira hodi atendementu publiku diak liu tan nian iha fatin servisu.
“Ami sente kontente bele mai tuir formasaun, tanba ami mos seidauk iha esperensia, nunee ami agradese tebes tanba bele loke formasaun,” katak Mardiana Natalia da Costa.
Entretantu formasaun nee partisipante hamutuk nain 25, kompostu funsionariu permanente no kontratadu neebe servisu iha Diresaun Servisu MKI Munisipal Lautem, Vikeke, Manatuto, Manufahi no Baukau.
(tom)
