DILI, STLTIMORLESTE.com – Ministeriu Komersiu no Industria (MKI) lansa Plataforma Eletroniku Made in Timor Leste, atu apoiu fasilita mikro pekena media empreza asesu iha merkadu.
“Ohin lansamentu ba portal Eletronika Made in Timor Leste, ida nee hanesan Plataforma ida MKI halo hodi fo espasu fasilita ita nia mikro Pekena media empreza para bele asesu efisiente liu ba iha merkadu,” hatete Ministru Komersiu no Industria (MKI), Filipus Nino Pereira ba jornalista sira iha Salaun Multiusus GMN, Bebora, Segunda nee (09/12/2024).
Nia dehan, MKI rekonhese katak merkadu nee kiik presiza iha meus online, nunee aproveita teknolojia neebe iha hodi oportunidade boot no luan liu tan ba iha setor privadu sira liu-liu mikro Pekena sira neebe durante nee sira produs produtu-produtu nee, maibe balu ho kuantidade natoon no balu kuantidade boot neebe agora sirkula hela iha merkadu ema konsumu daudaun.
Tanba produtu balu konsumidores sira hatene, maibe balun mos ladun hatene produtu nee tama iha supermerkadu neebe, nunee informasaun sira nee presiza duni merkadu eletroniku para bele fo informasaun kona-ba presu, kona-ba produtu nee rasik iha neebe para nunee bele fasilita diak liu tan konsumidores sira bele sosa nee hanesan meus ida para atu haforsa liu tan liu-liu parte merkadoria marketing nian.
Nunee liu husi Plataforma eletroniku nee enkoraja setor privadu mikro pekena media empreza sira atu promove diak liu tan sira nia produtu nee, laos iha rai laran maibe mos globalmente bele ba rai seluk.
(joa)
