DILI, STLTIMORLESTE.com – Ministru Negosiu Estranjeiru no Kooperasaun (MNEK), Bendito Freitas aprezenta relatoriu atividade ministeriu nian ba iha Prezidente Republika, Jose Ramos Horta.
Bainhira remata atividade no relatoriu, Ministru Negosiu Estranjeiru no Kooperasaun, Bendito Freitas ba jornalista sira iha Palasiu Prezidensial Nikolao Lobato, Bairo Pite Tersa nee (22/07/2025) hatete, ohin mai hasoru Prezidente Republika hodi relata atividade no relatoriu ministeriu nia ba Xefe Estadu.
“Ohin dia 22 Julhu hau mai hasoru ho ita nia excelência Prezidente Republika atu hatoo mos kona-ba relatoriu atividade sira servisu misaun nia vizita sira neebe iha liu-liu mos kona-ba enkontru ho MNEK iha ASEAN nia nee iha Kuala Lumpur, rona mos orientasaun husi simeira CPLP nia iha Guinea Bissau nee importante,” katak Ministru.
Prezidente Republika mos informa kona-ba nia viajen estadu nia iha fulan sira mai nee too Dezembru iha atividade barak maibe Prezidente sei ba ida importante liu nee.
“Husi nia hau nia parte mak informa ba Prezidente kona-ba ita nia preparasaun ba adezaun final ba ASEAN neebe sei akontese iha 26 Outubru iha Kuala Lumpur ita nia reprezentante husi lider nasaun nia neebe hola parte iha jornada istoria politika adezaun ASEAN,” katak PR Horta.
Ministru dehan, durante nee Prezidente mos halo kontaktu ba nasaun barak, no agora Timor Leste mos hetan ona rekonhesimentu atu tama ASEAN, tanba nee mak Prezidente sei koalia ho Prezidente ba ASEAN atu haree komposizaun delegasaun neebe ke bele ba ASEAN.
Ministru dehan, iha neeba iha pilar importante iha kuaze 66 legais neebe ke maioria prienxe hotu ona.
Iha biban nee Prezidente Republika Jose Ramos Horta hatete, programa Ministeriu Negosiu Estranjeiru no Koperasaun nia programa nee todan.
“Programa Ministru nia todan tanba ASEAN no CPLP tanba bilateral no internasional sira seluk, hau mos ajenda agora too Dezembru nee todan tebes hau sei kansela balun tanba todan demais ema oin-oin rai oin-oin ba too iha Japaun ba too iha Suiza, Novembru ba Angola ho rai lubuk ida,” katak PR Horta.
(eme)
