DILI, STLTIMORLESTE.com – Mobilizasaun aifunan no Retratu Sua Santidade Papa Francisco nian husi Prasa Estatua Nai Feto Lesidere ba Tasi-Tolu, husi Lesidere ba Motael Nunsiatura Apostolika, omenajen husi Motael ba Palasiu Prezidenzial, Fatuhada, Komoro konklui Tasi-Tolu, hahu tuku 09.00 dader.
“Komisaun konjunta neebe kompostu husi Governu no Igreja informa ba públiku enjeral katak, iha loron Sabadu (26 Abril 2025), oras tuku 9:00 dader, sei hahú mobiliza ai-funan, Papa Móvel (Pope Mobile) no retratu husi Sua Santidade Papa Francisco nian husi Prasa Estatua Nain Feto Lesidere ba Tasi-Tolu, komboiu ho nia route husi Lesidere ba Motael Nunsiatura Apostólika (sei para minutu ida) hodi omenajen iha Nunciatura Apostolika Farol, kontinua husi Motael ba Palásiu Prezidensiál, Fatuhada, Komoro no konklui iha Tasi-Tolu,” hatete Vigariu Episcopal Asuntu Pastoral Arkedioseze Dili, Padre Jovito Rego de Jesus Araujo liu husi konferensia iha Altar Tasi-Tolu, Sesta nee (25/04/2025).
Pe. Jovito informa, ba komunidade sira bele asiste iha estrada tuir route neebe mak iha, hahu husi Lesidere too iha Prasa Tasi-Tolu.
Iha parte loraik, orgaun Soberanu, Eis Titulares, Membru sira Korpu Diplomátiku no reprezentante sira husi Ajénsia Internasional, sei laiha konvite ofisial no komisaun konjunta Governu no igreja prefere atu utiliza veíkulu ho numeru matrikula ofisiál nian hodi bele asesu ba área estasionamentu neebe dezignadu ona iha Tasi-Tolu.
Pe. Jovito hatete, ba sarani sira neebe ho veíkulu privadu sei para hotu iha tasi-ibun Tasi-Tolu nomos Aeroportu Internasionál Nicolau Lobato, wainhira parte tasi ibun Tasi-Tolu nian nakonu no sarani sira husi parte Oeste transporte sei para iha Tibar Pelican paradise.
Enkuantu, ba media sira, komisaun prepara ona fatin neebe dezignadu, sira neebe hakarak atu halao operasaun drone iha fatin Misa Tasi-Tolu tenke halo koordenasaun ho komisaun organizadora, atu nunee bele rejistu, sei la permite atu utiliza drone neebe la autorizadu.
Pe. Jovito husu sarani atu labele fiar informasaun falsu husi ema sira neebe mak laiha edukasaun, moral no responsabilidade hodi publika informasaun falsu sira iha média sosial, hodi hamate espiritu fiar sarani katolika Timoroan hotu atu partisipa ativu iha misa funeral ba Sua Santidade Papa Francisco nian, tuir sekuensia neebe mak hatoo iha leten, tanba nee husu ba públiku atu rona deit komunikadu ka informasaun ne’ebé fó sai husi Komisaun Konjunta Governu no Igreja.
“Ami hatoo ami nia agradesimentu sinseru ba kooperasaun no apoiu husi parte hotu-hotu hodi garante susesu no solenidade ba eventu signifikativu ida nee,” hatete Pe. Jovito.
(joa)
