DILI, STLTIMORLESTE.com – Reprezentante Santa Se iha Timor Leste, Monsenhor Marco Sprizzi hateten, kondisaun Papa Francisco iha ona faze neebe kritiku, tanba nee nia husu sarani atu halo orasaun, nunee Papa Francisco bele rekopera husi moras Pneumonia.
“Senseramente hotu-hotu preokupa ho kondisaun Amu Papa nia neebe iha kritiku nia laran, ho kondisaun difisil. Tanba nee presiza orasaun no reza barak liu tan ba rekoperasaun saúde papa Francisco nian,” hatete Monsenhor Marco Sprizzi ba jornalista sira iha resintu Parlamentu Nasional, Segunda (24/02/2025).
Monsenhor hatutan, mediku sira halo hela esforsu hotu-hotu, atu nunee Papa Francisco bele rekopera husi moras Pneumonia no komplikasaun kiik sira seluk neebe afeita direita ba papa nia kondisaun atual.
Tanba nee nia hein katak Maromak laran luan bele fo ba Santu Padre grasa isin diak, atu nunee bele simu peregrinu sira husi nasaun hotu-hotu inklui Timor Leste iha tinan juvileu esperansa nian.
“Ita hotu iha esperansa ba saude Papa Francisco Nian. Misa ba Santu Padre nia saude, parokia hotu-hotu halo kada loron no iha Nunciatura no katedral sempre oferese Misa Espesial ba saude Santu padre nian,” tenik nia.
Sorin seluk, Xefe Bankada Partidu Demokratiku (PD) Manuel Noronha lori Bankada Partidu Demokratiku nia naran hatoo sentidu Solidariedade ba Amu Papa Francisco neebe oras nee halo hela tratamentu iha hospital Gemelli, Roma, Italia, tanba sofre moras Pneumenia.
“Reprezenta Bankada Partidu Demokratiku lori estrutura tomak no militante partidu nian naran hatoo ami nia sentimentu solidariedade no orasaun ba Sua Santidade Papa Francisco bele rekopera lalais husi nia moras nee, nunee bele halao knaar hanesan baibain,” dehan Deputada Manuel Noronha.
(alb)
