DILI, STLTIMORLESTE.com – Reprezentante Vatikanu iha Timor Leste, Nunsiu Apostoliku, Monsenor Marco Sprizzi hasoru malu ho Primeiru Ministru (PM), Kay Rala Xanana Gusmão, hodi hatoo ninia despedida, tanba mandatu iha Timor Leste remata ona.
“Ohin hau mai atu despede, kumprimenta no agradese ba Primeiru Ministru, iha tempu ikus hau nia misaun iha Timor Leste hanesan Reprezentante Santu Padre iha nee.
Agora Santu Padre nomeia hau hanesan Prezidente Autoridade trabalhu Santa Se nian, signifika hanesan Miinistru iha Vatikanu,” hatete Reprezentante Vatikanu iha Timor Leste, Nunsiu Apostoliku, Monsenor Marco Sprizzi ba jornalista sira iha Palasiu Governu, Dili, Kinta (13/02/2025).
Nia hatutan, Vatikanu seidauk halo komunikasaun ho Estadu Timor Leste atu nomeia fila fali reprezentante Santa Se iha Timor Leste, maibe tarde liu molok fulan Marsu Vatikanu nomeia ona reprezentante Santa Se mai halo servisu iha Timor Leste.
“Seidauk iha komunikasaun espesial entre Vatikanu no Estadu Timor Leste, maibe Santa Se servisu hela atu iha semana sira mai nee bele iha ona susesor ka reprezentante Santa Se ofisial atu halo servisu iha Timor,” tenik nia.
Nia akresenta liu tan katak, tinan 6 servisu iha Timor Leste nakonu ho maravilhosa, tinan 6 neebe halo povu Timor Leste hela metin iha ninia fuan.
“Tinan 6 hau esperomenta Maromak nia grasa, ho amizade no karinu husi povu Timorense bainhira vizita munisipiu sira, parokia sira, no too ba aldeia no suku sira inklui kapela sira iha area remotas, Timoroan sira sei nafatin iha hau nia fuan, no ita hamutuk realiza ona buat barak no buat sira nee hela metin iha uma kreda Timor, no hau sei la haluha povu Timor no povu ida nee sei hela metin iha hau nia fuan,” dehan nia.
(alb)
