DILI, STLTIMORLESTE.com – Montante konsesaun eskolar neebe Ministériu Edukasaun (ME) atu atribui ba eskola sira, ninia montante seidauk hatene, tanba sei halo kalkulasaun ba dadus estudantes husi eskola idak-idak.
Kestaun nee hatoo husi Diretor Nasional Ensinu Sekundariu iha ME, Benjamin Gomes da Cruz Fernandes ba STL, Kinta nee (05/02/2026).
“Kona-ba relatóriu konsesaun eskolar hatama hotu ona, agora hein atu halo hela, hein tinan tuir mai, hein dadus estudantes tama hotu para ami halo fila-fali ba tinan 2026 nian, tanba nee relatóriu husi eskola sira tama hotu ona, agora preparasaun ba halo primeiru no segundu trimestre nian ba tinan 2026. Konsesaun nee atribui depois de aprovasaun, nee duni molok Maiu ou Junhu sira nee bele hetan ona osan ida nee,” nia esplika.
Nia dehan, kona-ba montante osan neebe atu atribui ba eskola sira nee, tanba dadus seidauk tama hotu no sira seidauk bele kalkula ninia montante orsamentu refere, tanba nee dadus nee tama hotu tiha mak sira bele hatene katak, sira atu hetan hira.
Entretantu Diretor Eskola Sekundariu Jeral 10 dezembru Komoro, Manuel Verdial hatete, kona-ba konsesaun eskolar too agora sira seidauk simu, tanba sira foin konklui sira nian relatóriu ba Ministériu Edukasaun.
“Hau hanoin kona-ba konsesaun eskolar nee, tanba falha iha relatóriu, laos ami mesak lae, maibe husi ita nian eskola idak-idak relatóriu la hanesan, maibe ami rezolve ona, tanba nee ami foin mak konklui ami nian relatóriu ba Ministériu Edukasaun, nee duni eskola sira sekundariu iha Munisípiu Dili neebe relatóriu ami submete ona, hein katak iha fulan ida nee osan nee bele sai ona,” dehan nia
.
Manuel hatutan, konsesaun eskolar nee kada estudante ida dolar rua no eskola uza osan ida nee sei tuir duni nesesidade eskola nian, nee duni durante nee sira ezekuta osan ida nee tuir nesesidade eskola nian.
(jac)
