BAUKAU, STLTIMORLESTE.com – Ministeriu Obras Publikas (MOP) hamutuk ho Autoridade Munisipiu Baukau, avalia servisu kompanhia implementador projetu estrada rural iha Munisipiu Baukau.
Delegasaun Visi MOP, atual Asesor Prinsipal ba Visi MOP, Rui Hernani esplika, durasaun servisu avalia ba projetu estrada rural sira iha Baukau durante loron 4, neebe hahu iha loron 10-13 nee iha Postu Administrativu 8, maibe ekipa nota projetu barak lao tarde, tanba ezekuta projetu seidauk remata tuir kontratu neebe ministeriu ho parte kompanhia implementador selebra.
“Ita monitoriza iha pakote 35, balu lao diak, tanba lao lais, maibe balu mos lao kudeik no balu la lao liu,” hateten Rui iha salaun apuramentu Baukau, Sesta nee (14/03/2025).
Nia sublina, projetu estrada rural neebe daudaun implementa iha Munisipiu Baukau hamutuk pakote 35, responsabiliza husi kompanhia lokal 35, iha neebe durante loron 4 ekipa husi Ministeriu Obras Publikas monitoriza servisu kompanhia nian iha terenu nota, maioria lao tarde, tanba kestaun fator sosial hodi implika ba ezekusaun servisu.
Nia fundamenta, relasiona implementasaun projetu estrada rural, Governu estabelese liu husi kompanhia sira atu responde problema kondisaun estrada neebe povu iha baze enfrenta, maibe kestaun fator sosial kontinua mosu, tanba hahalok husi komunidade lokal balu nia interese hodi impede projete.
Nunee ekipa sei hatoo rezultadu monitorizasaun ba ministeiru nunee bele fo solusaun hodi la implika ba orsamentu sira neebe aloka ba projetu estrada rural, aleinde mos informa kompanhia neebe la termina projetu tuir kontratu, tanba balu fator sosial la implika ba servisu, maibe implementa projetu tarde, tanba kompanhia balu responsabiliza projetu 2.
“Ita sei informa ba Governu atu haree, tanba kompanhia sira la termina tuir kontratu nee kestaun boot, impede dezenvolvimentu. Hau hanoin prezisa aprezenta ba ministeiru tenke haree aspetu legal analiza hola medidas karik hakotu, ita hakotu,” Rui salienta
Asesor prinsipal nee argumenta, kompanhia neebe implementa projetu tarde liu, too ona tinan 4 seidauk finaliza projetu, sei hatoo ba ministeriu hodi analiza liu husi aspetu legal hodi foti medida hasoru kompanhia.
Enkuantu Sekretariu Munisipal Planeamentu Investimentu No Dezenvolvimentu, Eduardo Filipe Ximenes sublina, kompanhia lokal sira neebe responsabiliza hodi reabilita estrada rural iha Baukau, barak mak servisu la loos, tanba dala barak ona kompanhia sira abandona servisu hodi la termina projetu tuir kontratu neebe selebra ona.
“Ami simu relatoriu lubuk ida husi Xefe Suku sira, empreza barak mak servisu la loos, neebe sei dirije ba ministru para hapara tiha buka empreza seluk tau fali,” nia realsa.
Eduardo relata, kompanhia sira neebe durante servisu la loos iha terenu mak hanesan Ruvic, Lamegua Star, Lialura, Jatono, Lalaisi no seluk tan, tanba hetan projetu 2 iha fatin difirente hodi prejudika ba projetu iha fatin seluk.
Tanba nee sei relata karta ba Ministeriu Obras Publikas hodi fo atensaun ba kompanhia neebe jere projetu 2 hodi fo ba kompanhia seluk hodi aselera.
Entretantu Diretora kompanhia Rosa Maria Ornai neebe daudaun jere mos projetu estrada rural iha Suku Tekinomata, Postu Laga, diresaun husi Dailari ba Samaguia nee deklara, kauza implementasaun servisu iha terenu tarde, tanba impaktu selebrasaun kontratu servisu neebe realiza.
“Konkursu no asina kontratu sempre iha tempu udan, nee prejudika ba kompanhia, tanba tempu udan servisu labele lao, tanba nee ami husu, se bele konkursu labele halo iha tempu udan no rekomenda projetu labele lao iha tempu udan,” nia hakotu
Entretantu aprezenta avaliasaun nee realiza iha salaun apuramentu Baukau, neebe hetan partisipasaun masimu husi nain ba kompanhia implementador projetu sira iha Munisipiu Baukau.
(EST 1)
