DILI, STLTIMORLESTE.com – Daudaun nee tempu udan, tanba nee mosu inundasaun no rai halai taka estrada iha fatin-fatin, tanba nee presiza Ministeriu Obras Publika (MOP) kontinua atende urjente.
Deputadu husi Bánkada KHUNTO, Antonio Verdial hatete, orsamentu 2025 nee Parlamentu Nasional (PN) aprova boot tebes ba Ministeriu Obras Publika (MOP), tanba nee presiza tebes Governu atu tau atensaun ba kondisaun estrada neebe aat iha territoriu laran.
“Ita hotu hatene katak, Parlamentu aprova orsamentu ba MOP iha tinan ida nee orsamentu boot, tanba nee agora tempu udan impaktu ba estrada aat, raí halai taka estrada, tanba née presiza halao atendimentu urjente atu normaliza situasaun hodi labele fo impaktu ba movimentu”, katak Deputadu Antonio Verdial ba STL iha PN, Dili, Sesta (17/01/2025).
Nia dehan, nafatin fo hanoin ba governu atu haree estrada hotu iha Timor laran, liu-liu haree estrada neebe mak kotu no rai monu taka atu normaliza urjente, nunee fasilita movimentu komunidade.
Entretantu Visi Ministru Obras Publika (V-MOP), Julio do Carmo hatete, kona-ba kondisaun estrada neebe rai halai taka no inundasaun, MOP prontu atende hodi normaliza.
Liu-liu iha Dili laran, sira prontu 24 oras hodi atende bainhira mosu inundasaun ka rai taka metin estrada.
Maibe sira nia atendimentu nee laos ba deit Dili, maibe ba territoriu laran tomak.
(gui)
