BAUKAU, STLTIMORLESTE.com – Ministeriu Obras Publikas (MOP) sei halo survei hikas ba estrada urbana Baukau Vila hafoin reabilitasaun.
Ministru Obras Publikas, Samuel Marçal hateten, kondisaun estrada urbana aat laos iha deit Munisipiu Baukau, tanba iha munisipiu seluk hanesan, iha Munisipiu Vikeke, Ermera, Lautem mos presiza, tanba nee dezenhu ba estrada urbana ba munisipiu neebe konklui bele hahu ona, maibe estrada urbana ba munisipiu neebe seidauk kompleta dokumentus daudaun sei iha faze preparasaun.
Kona-ba kondisaun estrada urbana Baukau Vila, Ministru Obras Publikas sei hamutuk ho ekipa ida husi Nasional halo survei hikas, neebe presiza organizadu ba sidade ida bonita.
“Dezenhu kasar iha ona, mais sei haree fali fasilidade sira hau dehan, tanba nee tempu badak hau sei mai fali ho arsitetu sira halo survei ida diak para bee, ahi, lixu, para fatin neebe sidade kapas,” hateten Ministru Samuel Marçal neebe STL asesu iha pajina facebook Autoridade Munisipiu Baukau, Sesta nee (01/08/2025).
Governante nee esplika, dezenhu ba estrada urbana Baukau Vila iha ona, maibe prezisa haree hikas fasilidade sira neebe atu kompleta, tanba nee ekipa Ministeriu Obras Publikas sei halo hikas survei ida diak liu-liu kanalizasaun bee nian, rin eletrisidade, prepara lixu fatin, fatin parajen transporte, fatin ba ema lao ain no seluk tan neebe presiza kompleta.
Nia sublina, preparasaun sira nee hotu ho integradu been organizadu ema hotu sei vizita no setor privadu sira mos bele halo investimentu hodi krese roda ekonomia iha Baukau bele lao.
“Baukau Munisipiu ida que potensial tebes aban bairuak sai fatin tranzitu diak ida kuandu ema ba vizita Com fila mai toba iha nee, klima kapas bonito presiza deit ita dezenvolve infraestruturas para hadia Baukau diak liu tan,” Katak Samuel Marçal.
Entretantu estrada urbana Baukau Vila hamutuk kilometru 23.
(tom)
