BAUKAU, STLTIMORLESTE.com – Ministeriu Obras Publikas (MOP) seidauk halo estudu hodi halo reabilitasaun ba estrada urbana diresaun Vila Antiga ba Vila Nova, iha Postu Administrativu Baukau Vila, Munisipiu Baukau.
Asesor Prinsipal Visi Ministru Obras Publikas, Rui Hernani konfirma, reabilitasaun estrada urbana iha Munisipiu Manufahi, Suai inklui iha kapital Dili, Governu aloka orsamentu ona liu husi Ministeriu Obras Publikas hodi kontratu kompanhia sira hahu halo ona reabilitasaun, maibe estrada urbana iha Baukau Vila seidauk halo reabilitasaun, tanba atu halo reabilitasaun tenke hahu liu husi estudu, maibe too ohin loron seidauk iha estudu hodi reabilita.
“Estrada redi urbana Baukau nee estudus seidauk iha, dezenhu ho BoQ seidauk iha, dezenhu ho BoQ nee iha bainhira ita iha ona estudus,” hateten Rui Hernani iha salaun apuramentu Baukau, Sesta (14/03/2025).
Nia sublina, atu hakat ba prosesu reabilitasaun, prezisa halo uluk estudu hodi analiza ba estrutura rai material gastus sira, hanesan rai no fatuk inklui mahar asfaltu nian hafoin prepara dezenhu ho BoQ hodi reabilita.
Tuir nia, kondisaun estrada urbana iha Baukau Vila daudaun nee grave no prezisa halo reabilitasaun hodi fo sirkulasaun movimentu diak ba ema ho transporte hodi evita asidente trafiku, tanba bainhira estrada kondisaun aat bele hamosu no rejistu asidente trafiku.
“Ami sei rekomenda ba ministeriu para pelu menus hahu ho estudus kona-ba reabilitasaun estrada nian,” nia argumenta.
Enkuantu Sekretariu Munisipal Planeamentu Investimentu No Dezenvolvimentu, Eduardo Filipe Ximenes hateten, prosesu reabilitasaun estrada urbana Baukau, Autoridade Munisipal submete ona dadus ba Ministeiru Obras Publikas no daudaun iha ona prosesu laran.
“Nee presiza duni halo reabilitasaun, tanba estrada agora ita haree grave tebes-tebes, neebe ita husu para tenke reabilita,” hateten Eduardo.
Entretantu dadus estrada urbana diresaun Vila Antiga-Vila Nova iha Postu Administrativu Baukau, neebe halo levantamentu no dadus submete ba nasional hamutuk kilometru 23.
(EST 1)
