DILI, STLTIMORLESTE.com – Liga ho kazu moras dengue neebe numerus sae makaas iha Hospital Nasional Guido Valadares (HNGV), Primeiru Ministru Kay Rala Xanana Gusmão sei hatoo Konselhu Ministru iha loron sesta hodi buka solusaun.
Primeiru Ministru Kay Rala Xanana Gusmão hatete, liga ho kazu moras dengue neebe oras nee sae makaas, nia sei hatoo iha reuniuan Konselhu Ministru neebe sei realiza iha loron Sesta, hodi bolu atensaun ba Ministra Saude nunee bele halo prevensaun.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha palasiu Prezidensial Nicolau Lobato Bairru Pite Kinta (29/01/2026).
“Se dengue nee sae makaas tebes ke hau hanoin hau foti desizaun hanesan Primeiru Ministru maibe hau la hatene, hau hatene moras maibe hau la hatene kura aan rasik mais hau dehan ema ida labele sai husi uma, sei haree,” dehan Primeiru Ministru.
Primeiru Ministru hatete nia lahatene klean konaba moras nia maibe nuudar primeiru Ministru sei hatoo iha konsellu Ministru nunee bele buka halo prevensaun ba moras refere.
“Sei haree, aban ami sei haree, problema moras sira neeb daet malu nee susar tebes, neebe aban iha konsellu Ministru ami sei husu,” dehan Xefe Governu Xanana Gusmão.
Aleinde nee Sekretaria Estadu Komunikasaun Sosial Expedito Dias Ximenes hatete, daudaun nee IX Governu liu husi Ministeriu Saude mos iha programa rega susuk nee kontinua lao hela iha komunidade sira nia leet.
“Agora daudaun Ministeriu Saude lao hela hodi rega susuk,” dehan Sekretaria Estadu ba Komunikasaun sosial bainhira PM Xanana husu Moras dengue nee daet husi neebe.
Aleinde nee tuir dadus husi Hospital Nasional Guido Valadares husi inisiu too Janeiru nia rohan pasiente dengue nain 245 mak halao tratamentu. Husi numeru nee nain haat mak lakon vida, kompostu husi feto nain tolu no mane nain ida.
Tuir Diretóor Servisu Apoiu Diagnostiku no Terapeutiku HNGV, Vida de Jesus Lopes hatete, kazu dengue neebe rejistu hahu husi 01 too 27 Janeiru 2026 hamutuk 245, maioria labarik ho idade tinan 2 too tinan 5, no kazu mate maioria ba labarik ho idade tinan 5 too tinan 9.
(eme)
