DILI, STLTIMORLESTE.com – Moras Diarea aas iha Sentru Saude Munisípiu Dili, tanba kauza husi mal alimentasaun no tempu udan hamosu efeitu ba moras nee.
“Durante nee Sentru Saude Munisípiu Dili rejista moras diarea ho raan hamutuk 678, husi nee Sentru Saude Bekora hamutuk 160, Komoro 387, Formoza 54, Metinaro 15 no vera kruz 62,” hatete Diretor Servisu Saude Munisipiu Dili, Mateus Pinto ba STL iha nia knaar fatin Farmoza, Dili, Segunda (03/2/2025).
Nia esplika, bainhira labarik moras diarea tenke lori lalais mai Sentru Saude nebee besik, tanba moras diarea nee mos perigozu.
“Ita Haree bebe sira ou labarik idade 5 mai kraik hetan moras diarea nee ita tenke kuidadu no lori lalais ba Sentru Saude neebe besik, sei ita la lori lalais ba mak semana ida rua nee bele perigozu ba nia vida,” nia esplika.
Iha fatin ketak, inan Deolinda Pereira informa, labarik moras diarea durante loron rua ona, maibe kondisaun saúde grave kedas, tanba muta, tee been no lakohi han.
“Loron rua ona kabun moras, muta, maibe hau koko fo bee deit, daan goiavas nia tahan, maibe labele nafatin, entaun hau lori halai mai Sentru saude Formoza hodi halo tratamentu, agora kondisaun diak oituan ona,” nia afirma.
Entretantu Sentru Saude Munisípiu Dili rejista mos asidente trafiku hamuutk 7.126, husi nee Sentru Saude Bekora hamutuk 1.585, Komoro 4.103 Formoza 379, Metinaro hamutuk 717 no Vera Kruz 342.
(jen)
