MAUBARA, STLTIMORLESTE.com – Hahu ohin loron 20 fulan Junhu tinan 2025, Movimentu Reafirmasaun ba Reformasaun Nasional (MORENA) eziste ona iha Timor-Leste (TL), hodi buka dalan loos ba povu nia moris ho ba nasaun nia diak.
Tanba tuir Portavoz MORENA, Adolfo Mendonca katak, too ona tempu atu kualia loos hatete moos. Sala dehan sala, loos dehan loos, tanba Timor-Leste laos ema ida rua nian mak mate terus hodi fila rai nee sai Republika.Timor ema hotu nian no Timor ba Timoroan hotu, maibe nain mak sira neebe rejiste hodi tolan lia fuan moruk mate ka moris ukun rasik aan.
“MORENA mosu atu fanun Timoroan tomak katak, ita nia ukun nain sira lori ita nia ukun rasik aan lao, kuaze tinan 24 maibe ita taka loke deit mak kolonial nia obra moos lahotu. Ita lalao sala dalan, karik ita nia sistema maka sala, se ita nia sistema sala mak ita presiza reforma ba dalan loos neebe ita hili ho lian lulik mate ka moris ukun rasik aan.Ita hili lia loos maibe ita mukit ba lia loos, ita la mukit ba lia loos maibe ita mukit ba ema sira neebe atu tesi lia loos. Ita la mukit ba ema matenek maibe ita mukit ba ema neebe laran moos,”dehan Adolfo liu husi konferensia imprensa neebe halao iha, Maubara, Likisa, Sesta (20/06/2025).
Adolfo dehan ba ukun nain sira buat neebe laloos mak hanesan reforma sistema ida neebe kondisiona korrupsaun, nepotismu ho koluzaun iha fatin fatin, liu liu broker neebe hamate atendimentu publiku husi speritu servi sai fali kampu atividade ekonomia.
Nunee moos reforma estrutura estadu nian hodi hakiik estrutura governu atu labele hatodan makina estadu nian, hodi garante ba boa governasaun ida neebe efetivu ho efikasia.
No hamenus vizita estranjeiru ba membru governu sira neebe lalori benefisiu ba nasaun ho povu.Tanba nasaun nee povu nian laos ukun nain nian.
Tanba nee restaura estrutura sobra RDTL nian neebe rejistensia uja iha faje libertasaun ba patria. CELCOM,NUREP,ZONA SUBREJIAUN NO REJIAUN, nuudar baze evidensia istoriku ba dalan hari estadu RDTL.
“Ita funu hodi muda sistema kolonial nian neebe halo operasaun ba povu, laos funu hotu ita restaura fali kolonial nia estrutura ate ba lalin mai tan Munisipiu kee laiha relasaun istorika ho ita luta libertasaun ba patria,”dehan nia.
Nia afirma, fo sai loloos anualmente ba publiku Timor-Leste nia reseitas fundu petrolifera nian ba publiku bele asssesu no revizaun ba lei organiniku, Kompanhia TIMOR GAP.Ep hodi negosia ho Kompanhia esplorador atu foti kouta 5 ba 10 pursentu hodi faan tama mai ,” Ita nia rai laran nunee bele garante ekonomia nasional iha estandarizasaun ida.
(car/eme)
