DILI, STLTIMORLESTE.com – Ema hotu moris mundu nee privizoriu deit, nia rohan mak mate hodi ba hasoru Aman iha lalehan. Tanba nee, durante sei halao peregrinasaun iha mundu presiza hadomi malu.
Liafuan nee hatoo husi Amu Selebrante, Padre Manuel de Aroujo Nunes da Silva liu husi homilia bainhira selebra misa Requem ba matebian Miguel Barbosa iha Kapela Kakaulidu, Tersa (18/11/2025).
Nia hatete, ema hotu hotu moris iha mundu provizoriu deit, nia rohan mak sei mate hodi hasoru fali Nain iha lalehan, tanba nee durante moris presiza buka halo diak no hadomi malu.
Padre hatete, familia neebe mate ona, no ida neebe mak sei moris iha mundu presiza reza tulun husu misa, nunee bele tulun no perdua sira neebe Nain bolu ona, nunee bele tama iha lalehan.
“Finalidade husi moris mak nee, ita hotu hotu sei ba hamutuk ho Aman. Pai Miguel semana rua nia bolu hau mai iha nee iha nia uma ami konversa oituan antes atu konfesa koalia buat barak ba hau, konfesa hotu tiha nia konta buat barak ba hau maibe, depois nia konta ba hau, no fulan rua kotuk misa iha Kasnafar mos nia dehan ba hau katak hau mate karik Amo mak misa, hau dehan Pai keta koalia lai liafuan nee ami sei hakarak Pai iha nee lai. Pai hau kompre ona ita nia liafuan mai misa ba ita,” dehan Padre nee.
Padre hatete, remata konversa Matebian mos koalia ba Padre katak bainhira mate husu familia halo misa loron 40, loron – loron nee reza ba nia, ida nee Matebian prepara nia aan diak tebes.
Iha biban nee Padre haktuir, durante moris iha mundu presiza halo diak ba malu, karik iha naksalak ruma iha familia sosiedade buka koalia ho ulun malirin, nunee bainhira tempu too nain bolu hikas bele moris hakmatek iha lalehan, karik moris iha mundu halo hahalok ruma naksalak nuudar ema la ses husi sala, maibe ida neebe mak sei moris iha mundu presiza reza, nunee nain iha lalehan bele perdua no simu iha nain nia kadunan Santo.
Jornalista: Emerenciana Pinto
Editora: Domingas Gomes
