DILI, STLTIMORLESTE.com – Guarda Prizional ho naran Apolinario Soares remata ona nia peregrinasaun iha mundu no husik hela feen ho oan nain 4.
“Ministeriu Justisa Diresaun Nasional iha prizaun tolu, liu-liu Prizaun Bekora sente triste, sente lakon pesoal guarda ho kapasidade, abilidade, responsabilidade, ema ida ho karakter diak tebes no ami sente lakon,” dehan Diretor Jeral Servisu Prizional, Delfio Alves ba jornalista STL iha Kaikoli, Segunda (01/09/2025).
Tuir Deflio katak, matebian mate iha loron Kinta kalan maizumenus iha tuku 10:00, no antes destinu too nia sei iha uma konversa ho nia kaben no oan sira, matebian sente moras iha parte dada iis nian lori ba iha Sentru Saude Komoro enfermeira sira fo aimoruk no fila tiha ba uma.
Nunee, too mai iha uma matebian sente ladun diak tanba nee husu ba iha nia kaben hodi lori nia ba iha Sentru Saude Vera Kruz, maibe too iha neeba la konsege salva nia vida, tanba matebian sofre moras diabetes. No Guarda Prizional Bekora fasilita apoiu lori matebian nia isin no mos apoiu husi konselhu veteranus, iha loron Sabadu nee lori kedan matebian nia isin mate ba iha nia hela fatin iha Postu Administrativu Lete Foho.
No matebian nia isin halot ona iha loron Domingu nee, iha oras tuku 3:30 loraik.
Nia splika, matebian mate husik hela oan nain 4 ho nia kaben no hahu halao knar hanesan Guarda Prizional hahu iha tinan 2007, no tuir regra neebe iha kuandu matebian mate ona, iha asuntu administrasaun funsaun publiku fo dalan ba sira hetan nafatin seguransa sosial, bele temi dehan pensium no morte nian.
Nunee parte prizaun koordena ona ho parte familia liu-liu matebian nia kaben, tempu badak sei haree hodi kompleta dokumentus sira hodi prosesu ba iha pensaun morte nian, tanba prazu atu trata durasaun fulan tolu deit.
Nia ublina, matebian durante nee koloka iha Prizaun Bekora, maibe momentu mate nee matebian lisensa anual no iha hela uma, hafoin ikus mai matebian hakotu iis.
Tuir observasaun STL nian, durante nee matebian inklui mos Guarda ida neebe halao knaar, hodi lori dadur sira mai tuir julgamentu iha Tribunal Dili.
Nunee mos.informasaun neebe STL hetan, matebian mai husi Suku Haupu, Postu Administrativu Lete Foho, Munisipiu Ermera.
Jornalista: Terezinha De Deus
Editor: Xisto Mendonça
