BAUKAU, STLTIMORLESTE.com – Korente mota Uaiaka ho naran konhesidu mota Mulia diresaun Baukau-Lautem lokaliza iha Munisipiu Baukau, hakotu ona ema nain hitu (7) nia vida inklui lori kareta no motor hamutuk 19.
Habitante Mulia atual Xefe Suku Uaitame, Celestino Freitas Moreira hateten, mota Uaiaka ho naran konhesidu mota Mulia iha tempu udan kada tinan difikulta movimentu transporte publiku no privadu, tanba laiha ponte no korente mota sempre perigu, maibe motorista balun tenta ultrapasa neebe too balun lakon sasan hanesan motor, kareta aat, tanba korenta mota lori no pior liu tan balun lakon vida.
“Inisiu ukun aan mota nee lori motor sia (9) ona, kareta tempu Indonezia nian hitu (7), iha Timor ukun aan nee kareta tolu (3) no ema mate nain hitu (7) hanesan nee,” hateten habitante Mulia, atual Xefe Suku Uaitame, Celestino Freitas Moreira ba jornalista STL iha Mulia, Kinta (12/06/2025).
Nia sublina, inisiu ukun aan korente mota mulia lori motor hamutuk unidade sia (9) no kareta unidade tolu (3) la rezulta ema mate, maibe kondisaun motor no kereta la aproveita, mezmu komunidade sira ajuda lori sai husi mota laran.
Enkuantu iha tempu okupasaun Indonezia neebe korente mota lori kareta unidade hitu (7), husi kareta unidade neen (6) la rezulta ema mate, tanba konsege salva husi komunidade sira, maibe iha kareta ida ho ema nain hitu (7) kuaze la konsege salva, tanba korente mota lori ema ho kareta tama too tasi laran.
“Hau hanesan Autoridade koalia tiha ona ho ita nia Prezidente Autoridade Munisipiu no orienta hau ba Diretor Servisu Munisipal Obras Publikas ami sukat ona nia luan metru 350, dehan atu konstrusaun ponte maibe seidauk,” Celestino fundamenta.
Nia akresenta, mota Mulia presiza tau atensaun, liu husi konstrusaun ponte hodi fasilita movimentu ema ho transporte publiku no privadu, tanba daudaun laiha ponte, maibe utiliza deit pasadeira neebe tempu udan difikulta movimentu transporte.
Liga asuntu nee, STL tenta konfirma Diretor Servisu Munisipal Obras Publikas Baukau, maibe laiha fatin atu fo komentariu, tanba sei halao hela servisu iha fatin seluk.
(jen)
