BAUKAU, STLTIMORLESTE.com – Relasiona udan anin neebe akontese iha loron 22 Fevereiru 2026 nee, mota Sumako hamate sidadaun Idelfonso Soares, idade 37, iha Aldeia Data Metan, Suku Umatolu, Postu Administrativu Lakluta, Munisipiu Vikeke.
Informasaun nee hatoo husi Komadante Operasional Autoridade Protesaun Sivil Munisipiu Vikeke Cerilo Soares Gomes ba STL liu husi WhatsApp, Segunda (23/02/2026).
“APC Vikeke hetan informasaun nee husi Xefe Suku Umatolu katak, nia komunidade horkalan lao la fila uma no ohin dader familia hetan fali ona maibe ho kondisaun mate ona,” Cirilo informa.
Nia esplika, kronolojia ba insidente nee husi Autoridade Suku Umatolu ba Autoridade Protesaun Sivil katak, iha loron 22 Fevereiru parte dader sidadaun refere ba iha seremonia aifunan hodi han no hemu hamutuk ho familia sira too loraik pur-volta tuku 18:00 no kontinua ba rate kari aifunan.
Maibe sidadaun refere la ba rate, tanba dekalara atu ba nia toos haree animal sira, maibe too kalan familia hein nafatin seidauk too uma nunee parte dader buka tuir hetan nia mate isin iha mota Sumako.
“Tuir informasaun husi Xefe Suku katak nia ba toos fila hakur mota mak mota lori. Hau deskonfia deit tanba sira hemu hela nee mak keta lanu karik mak akontese hanesan nee. Matebian agora tau iha nia uma,” Cirilo informa.
Enkuantu Administrador Postu Lakluta, Pascoal Gama Martins sente triste ho insidente refere, tanba laiha ponte iha mota refere atu fasilita komunidade sira nia movimentu, nunee sidadaun refere tenke hakur mota too lakon vida.
“Nia ba toos mak fila mai bee lori tiha iha mota Sumako, tanba horseik udan boot oras 4 hanesan bee lori nia pur-volta kilometru 1,” Pascoal informa.
Nia katak, iha fatin insidende nee antes nee iha ponte fasilita komunidade sira nia movimentu lao ain ho transporte publiku no privadu sira, maibe dadaun aat ona, nunee komunidade refere foti dezisaun liu husi hakuur mota too lakon vida.
Nia komenta, relasiona ponte iha mota Sumako neebe dauduan nee laiha, Autoridade Postu Submete ona pedidu ba Ministeriu Obras Publikas, maibe seidauk iha resposta.
“Ami nafatin rekomeda para ponte nee bele halo, tanba impaktu ba komunidade Suku 4 labele lori sai produtu merkadu, tanba ponte iha mak komunidade bele lori sai produtu ba merkadu,” nia hakotu.
(tom)
