DILI, STLTIMORLESTE.com – Ministeriu Publiku iha alegasaun ba krime dezobidensia, husu Tribunal atu aplika pena multa ba arguidu inisial JSP.
Iha alegasaun nee Prokurador haree katak, arguidu nia aktu prienxe duni ba krime neebe iha, tanba nee husu Tribunal atu aplika pena multa ba arguidu.
Enkuantu husi defeza arguidu nian deklara katak, arguidu konfesa ba faktus, tanba nee husu Tribunal tetu hodi aplika desizaun neebe justu.
Rona tiha alegasaun, Tribunal adia ba loron seluk hodi rona desizaun.
Antes nee tuir akuzasaun katak, iha loron 22 fulan Fevereiru tinan 2024, iha oras 11h45, iha Taibesi monumento Calma, Dili, momentu neeba lezadu haree arguidu kahur masa ka rai henek hodi halo moru hodi satan netik be neebe mak tama ba arguidu nia uma.
Bainhira arguidu hada hela moru refere, lezadu mos ba husu ba arguidu katak, labele hada lai moru iha rai nee, tanba desizaun husi Trbunal Primeira Instansia Dili.fo ona Despasu hodi bandu lezadu no arguidu labele halo uma ka moru ruma iha rai refere.
Tuir despaxu Judisial katak, rai nee sei disputa nia laran, nunee afavor ba lezadu hodi deside simu rekerimentu husi lezadu nian ba embargo de obra nova.
Tanba la satisfaz ho arguidu nia hahalok nee, nunee lezadu deside hodi halo keixa hasoru arguidu tanba arguidu la obedese ona desizaun husi Tribunal.
Arguidu halo ho forma livre deliberada no konsiente, hatene hela katak, la halo tuir ordem neebe maka autoridade Judisial mak fo neebe maka hatur ona iha desizaun judisial bele hetan kastigu, maibe arguidu halo nafatin nia hahalok nee, hanesan meiu ou instrumentu ida neebe mak aptu no adekuadu.
Arguidu mos hatene hela katak, hahalok sira nee tuir lei penal bandu.
Tanba nee mak konstitui arguidu sira, João da Silva Pedroso hanesan autoria material ba prtika krime Dezobediensia tuir artigu 244 husi Kodigu Penal.
Iha sala julgamentu nee, arguidu JdSP konfesa imparsial, tanba faktus neebe mak Ministeriu Publiku imputa ba arguidu nee loos, tanba iha momentu nee arguidu halo duni no hada sae blok rua, tanba iha tempu udan bee sae to iha arguidu nia uma.
Arguidu deklara, hada deit bloku atu satan bee, tanba kuandu udan boot bee lori ai, kalen aat sira nee, tanba iha baleta kuak kuaze 50 metru.
Arguidu deklara tan, prontu kolabora ho Tribunal bainhira ekipa sira ba halo inspensaun iha fatin akontesimentu.
Lezadu SM deklara, akontesimentu arguidu halo hela moru, nunee lezadu ba hase arguidu katak, antes nee Tribunal hatun ona desizaun katak labele halo konstrusaun iha nee, maibe arguidu hatan katak halo deit hakarak keixa ba Tribunal ou Polisia nia prontu ba hatan.
Lezadu SMAP deklara, bainhira arguidu hada hela batako mak vitima ba hase katak, prosesu nee sei lao hela iha Tribunal. No tuir lezadu nia haree katak iha arguidu nia uma bee la tama bainhira iha tempu udan.
Sasin EPP reforsa tan, sasin haree duni arguidu, halo moru hada batako, nofatin hada nee besik valeta, maibe iha tempu udan bee la tama iha sira nia uma.
Hafoin rona tiha deklarasaun arguidu no lezadu sira, Tribunal marka fali ba loron 19 fulan Janeiru tinan nee, tuku 2, hodi Tribunal halo inspensaun iha fatin akontesimentu.
Audensia julgamentu nee prezide hosi Juiz singular, Juiza Ana Paula, Ministeriu Publiku reprezenta husi Prokurador Aderito Tilman, no arguidu hetan asistensia legal husi Defensor Publiku José da Silva.
(ter)
