DILI, STLTIMORLESTE.com – Ministeriu Publiku (MP) iha alegasaun ba krimi violensia domestika ho forma ofensa integridade fizika simples, husu Tribunal atu kondena arguidu MMS ho pena multa.
Iha sala julgamentu laran Prokuradora estajiada haree katak, krimi neebe iha prienxe ba elementu hotu, tanba arguidu konfesa imparsial halo duni agresaun hasoru lezada ho inisial LS hanesan feen.
Tanba nee Ministeriu Publiku (MP) konklui katak, atu halo prevensaun iha futuru, MP husu Tribunal aplika pena multa ba iha arguidu, atu sai hanesan medida prevensaun ida ba arguidu, atu labele pratika tan aktu refere iha futuru.
Enkuantu defeza Manuel Exposto haree katak, arguidu foin primera vez mai iha Tribunal, arepende ona ba aktu neebe iha, no ida nee sai hanesan atenuantes ida, atu halo prevensaun iha futuru.
Tanba nee Defeza mos aseita ho pedidu MP nian, husu atu aplika pena multa ba arguidu, maibe pena multa ida neebe kaman korespondr ho arguidu nia kapasidade.
Rona tiha alegasaun, adia ba loron seluk hodi rona desizaun.
Tuir faktus katak, motivu husi problema nee, tanba deit lezada ba iha merkadu, no fila tarde mai uma, ho ida nee maka arguidu nervozu hodi halo agresaun.
Konsekuensia husi arguidu nia aktu, MP akuza arguidu hanesan autor ba krime violensia domestika.
Audensia julgamentu nee, prezide husi Juiz Singular, Jose Maria, Ministeriu Publiku reprezenta husi Prokuradora Estajiada, arguidu hetan asistensia legal husi Defensor Publiku, Manuel Exposto.
Jornalista: Terezinha De Deus
Editora: Carme Ximenes
