DILI, STLTIMORLESTE.com – Ministeriu Publiku (MP) iha nia alegasaun ba krimi Maus Tratus ho Forma Violensia Domestika, solisita ba iha Tribunal atu aplika pena suspensaun ba arguidu inisial MAFP hanesan laen, tanba provadu komete krimi hasoru lezada inial AdC hanesan feen.
Iha loron Kinta (24/07/2025) Prokurador Napoliao da Silva iha sala julgamentu laran deklara katak, ba prosesu ida nee arguidu konfesa imparsial ba faktus, maibe arguidu deklara katak depois akontese tiha problema arguidu no lezada diak malu fali no arguidu rasik husu deskulpa ba lezada. No husi akontesimentu nee too mai agora arguidu la halo tan violensia.
Prokurador haree katak ohin loron krimi violensia kontinua rejista ho numeru neebe aas, tanba nee halo prevensaun iha futuru atu labele akontese tan, Prokurador solisita ba iha Tribunal Koletivu atu aplika pena prizaun tinan 2 fulan 6, suspende ba nia periodu hanesan tinan 2 fulan 6.
Enkuantu Defeza Evanjelinho deklara katak, arguidu koopera no konfesa, haree katak husi akontese problema nee mai too agora la iha problema tan. Tanba nee defeza mos tau fiar katak, ba oin sei la akontese tan problema. Ho nunee defeza solisita ba iha Tribunal atu absolve arguidu.
Rona tiha alegasaun, Tribunal adia ba loron seluk hodi rona desizaun.
Iha faktus sufisiente katal, lezada AdC ho arguidu MAFP moris hamutuk hanesan feen ho laen iha tinan 2019, iha oan nain 2, ekonomikamente dependencia ba arguidu.
Akontesimentu dahuluk iha loron no fulan lezada haluha ona, maibe tinan 2021 nia laran, haleu oras tuku 21:00 OTL, iha Fumento, arguidu MAFP lori liman tuku ho makaas dala ida kona iha lezada AdC nia kanuruk.
Konsekuensia direta husi agresaun fizika nee lezada AdC hetan moras makaas iha kanuruk no oin halai, maibe lezada la ba halo tratamentu iha hospital.
Kauza hisi problema nee tanba entre lezada ho arguidu haksesuk malu.
Akontesimentu daruak iha loron lezada haluha, maibe fulan Julhu tinan 2021, haleu oras 22:00 OTL, iha Fumento 1, Dili, arguidu MAFP lori liman tuku ho makaas dala ida kona iha lezada AdC nia tilun hun sorin karuk.
Konsekuensia direta husi agresaun fizika nee, lezada AdC hetan moras makaas iha tilun hun sorin karuk, oin nakukun, triste, trauma no tauk.
Iha momentu neeba lezada ho kondisaun isin rua hela.
Kauza husi problema nee tanba entre lezada ho arguidu haksesuk malu.
Akontesimentu datoluk iha loron 15 fulan Abril tinan 2022, haleu oras tuku 10:00 OTL, iha Fomentu 1, Dili, arguidu lori liman tuku ho makaas dala ida kona iha lezada AdC nia kanuruk halo lezada monu tun ba rai, arguidu kaer iha lezada nia liman fuan kiik hodi silu.
Konsekuensia direta husi agresaun fizika nee lezada AdC hetan moras makaas iha kanuruk, oin nakukun no monu ba rai, liman fuan ikun moras, bubu no naksalak.
Lezada ba halo tratamentu iha Sentru Saude Komoro.
Kauza husi problema nee tanba arguidu haruka sira nia oan feto ida tolok lezada.
Arguidu MAFP halo ho forma livre deliberada no konsientemente, hatene katak halo beibeik agresaun fizika hasoru lezada hanesan konsta iha akuzasaun, nuudar tratamentu fizika ladiak hasoru nia konjuje, tanba lezada hanesan arguidu nia ferik oan rasik, maske nunee arguidu pratika nafatin hodi konkretiza dunik ninia hakarak.
Arguidu hatene katak nia hahalok nee proibidu no punidu tuir lei penal.
Tanba nee Konstitui arguidu MAFP nuudar autor material ho forma konsumadu ba pratika krimi maus tratus ba konjuje ho forma violensia domestika, previstu no punidu tuir artigu 154º husi Kodigu Penal konjuga ho artigu 2º, 3º no artigu 35º hosi Lei Kontra Violensia Domestika n.º07/2010, loron 07 fulan Julhu.
Audensia julgamentu nee prezide husi Juiz Koletivu, Ivan Patrocenio, Zulmira Auxiladora no Arjentino Nunes, Ministeriu Publiku reprezenta husi Prokurador Napoliao da Silva, arguidu hetan asistensia legal husi Advogadu Estajiadu, Evanjelinho Pereira Gusmao.
(ter)
