DILI, STLTIMORLESTE.com – Ministeriu Publiku (MP) delega prosesu hamutuk 17 ba iha Komisariu Komisaun Anti Korrupsaun (KAK), hodi halo investigasaun no iha prosesu hamutuk 6 mak KAK konklui ona investigasaun.
“Depois vagatura Diresaun Investigasaun foin hahu fali efetivu halao nia servisu iha fulan Julhu, no hahu husi fulan Julhu mai too iha Dezembru, simu delegasaun kompetensia husi Ministeriu Publiku hamutuk 17, ” dehan Diretor Investigasaun KAK, Jose Verdial ba jornalista sira iha Farol, Dili, Tersa (14/01/2025).
Nia hatutan, husi delegasaun kompetensia 17 nee, iha 6 mak too iha fulan Dezembru KAK konsege finaliza no liu husi Komisariu remete ba iha MP, falta prosesu 11 mak agora iha hela KAK.
Iha fulan Janeiru nee hetan tan delegasaun kompetensia ida, tanba nee oras nee daudaun prosesu hamutuk 12 mak KAK halo hela investigasaun. No labele finaliza prosesu sira nee iha tinan kotuk, tanba prosesu sira nee iha fim do ano mak foin delega mai, tanba nee labele finaliza. Maibe servisu investigasaun kontinua lao dentru prazu neebe MP fo. Prosesu sira neebe iha hela investigasaun nia laran labele adianta, maibe prosesu sira nee investigasaun kontinua lao.
Prosesus sira neebe haruka ba iha MP, ho tipu kazu primeiru mak abuzu poder, partisipasaun ekonomia, neebe akontese iha SEFOPE, Ministeriu Agriklutura, PNDS, Ministeriu Obras Publiku no Ministeriu Saude.
Tanba investigasaun neebe sira halao sempre iha nia prazu, balu loron 30, balu loron 70, balu loron 90, se la finaliza tuir prazu neebe iha, tenke halo relatoriu interklar no fo justifikasaun ba iha MP hodi sira bele hatene.
Iha fatin hanesan, Komisariu KAK, Rui Pereira dehan, kazu neebe delega husi MP ba iha KAK, inkuli mos Aviaun ZEESM, rai Fulolo, UNTL nian.
“Kazu neebe delega husi Ministeriu Publiku mai, Aviaun ZEESM nian delegasaun mai no investigasaun lao hela, tanba dokumentus sira nee ita presiza rekolha atu nunee ita hatene, krime nee akontese ka lae, presiza haklean investigasaun,” dehan Komisariu KAK, Rui.
(ter)
