BAUKAU, STLTIMORLESTE.com – Ministeriu Publiku (MP) realiza enkontu ho Komando Polisia Nasional Timor Leste (PNTL), atu prevene situasaun kriminalidade iha Munisipiu Lautem, Vikeke, Baukau no Manatuto.
Prokuradoria Primeira Instansia Baukau kooresponde ba Munisipiu Lautem, Vikeke, Manatuto inklui Baukau, tanba nee presiza tebes realiza enkontru ho Komadante seksaun sira husi Komando Polisia Munisipiu 4 refere atu haree ba atentu situasaun kriminalidade iha Munisipiu 4 refere liu liu iha loron boot finadu, natal no tinan foun, tanba dala barak selebrasaun loron finadu, natal no tinan foun sempre mosu perturbasaun ordem publika neebe nia konsekuensia afeta ba sidadaun sira neebe hakarak livre.
Nunee atu prevene asaun hirak nee, MP iha papel importante atu kolabora ho Polisia hodi prevene no la hamosu violensia oin oin iha sosiedade nia leet.
Komadante Operasaun husi Komando Polisia Munisipiu Vikeke, Superintendente Asistente, Jose afonao konsidera, enkontru nee importante, tanba atu hadia servisu Polisia nian no prepara planu ba futuru hodi servisu liu husi fo seguransa masimu liu tan ba komunidade sira iha evetu finadu, natal no tinan foun 2026.
“Enkontu ida nee Ministeriu Publiku mak realiza, nia objetivu atu hadia diak liu tan servisu seksaun investigasaun kriminal iha Munisipiu ida idak nian, hanesan Vikeke hatoo tiha ona ba Komando Nasional saida mak ami atu halo iha tempu finadu, natal no tinan foun no ami mos prepara ona rekursu atu responde ba situasaun neebe mosu mai,” Jose hateten ba jornalista sira, iha salaun MP, Vila Nova, Baukau, Kinta (23/10/2025).
Seguransa ba loron finadu tinan nee tuir nia, Komando Polisia Munisipiu Vikeke trasa ona planu no diriji ona ba Komando Jeral neebe hetan ona aseitasaun. Tanba nee Komando Polisia Munisipiu Vikeke prepara ona rekursu tomak atu fo seguransa ba komunidade sira iha loron finadu inklui natal no tinan foun.
“Finadu, natal no tinan foun ami garante seguransa ba sidadaun sira nia direitu atu nunee sira livre ezerse sira nia direitu movimentu ida idak nian,” Jose katak.
Aleinde mos nia dehan, iha enkontru nee Ministeriu Publiku (MP) husu atu parte Komando hadia formatu kazu nian, tanba kada kazu ida neebe durante nee MP simu husi formatu PNTL nakonu liu ho istoria kazu.
Nunee MP nia hakarak atu redus istoria husi kazu ida iha formatu laran, maibe kompetensia tomak iha Komando jeral, tanba parte Investigasaun husi Polisia ezekuta deit tuir regras Polisia haruka.
“Formatu neebe durante uza, formatu nee uniformeniza neebe labele mudansa, se karik atu halo mudansa ba formatu ida nee entaun tenke hatoo ba ami nia Komando Nasional atu nunee ami lao tuir saida mak Ministeriu Publiku fo mai tuir lei haruka,” Jose komenta.
Xefe Operasaun nee salienta liu tan, tuir MP nia hakarak atu minimiza faktus sira neebe la ezensia iha formatu laran no aprezenta deit mak faktus importante hodi fasilita liu tan prosesu investigasaun.
Jornalista: Tomas Reis
Editora: Carme Ximenes
