DILI, STLTIMORLESTE.com – Ministeriu Publiku (MP) iha alegasaun ba krimi Ofensa Integridade Fizika Simples, solisita ba iha Tribunal Singular atu absolve arguidu nain rua ho inisial GS no FG.
Iha alegasaun loron Segunda nee (17/03/2025), Prokurador Ricardo Leite deklara katak, prosesu refere antes nee iha tentativa konsiliasaun lezadu inisial AJG neebe hanesan vitima lakohi dada fila prosesu nee, tanba nee Tribunal kontinua halao julgamentu hodi rona deklarasaun arguidu nain rua nian.
Tribunal atu rona fali deklarasaun lezadu, maibe Tribunal notifika lezadu la mai. Ho nunee Prokurador haree katak, la iha deklarasaun ruma husi lezadu atu justifika katak, arguidu nain rua komete duni krimi refere. Ho ida nee Prokurador solisita ba iha Tribunal Singular hodi absolve arguidu nain rua.
Enkuantu husi defeza Humberto Alves deklara katak, lezadu mak hatoo keixa maibe ikus mai lezadu la kolabora, ho nunee husu Tribunal atu absolve arguidu nain rua.
Rona tiha deklarasaun nee, Tribunal adia ba loron seluk hodi rona desizaun.
Tuir akuzasaun neebe iha katak, lezadu AJG iha loron 15 fulan Maiu tinan 2023, iha tuku 09h00, lori bote atu ku kafe tasak, maibe iha dalan hasoru argudu GS.
Arguidu GS dehan ba lezadu katak husik hau mak ku kafe, faan atu halo rate, maibe lezadu dehan katak hau mak ku, faan atu selu matebian nia oan neebe eskola iha Dili, lezadu mos dehan katak, o durante tinan tolu ku la halo took rate.
Bainhira arguidu ho lezadu diskuti malu, la kleur arguidu FG lori ai fai iha lezadu nia matan laran parte karuk, arguidu FG ameasas lezadu katak asu! o hakarak hau baku mate tiha o agora.
Konsekuensia husi arguidu sira nia hahalok lezadu sofre kanek iha matan parte karuk ibun laran kanek no kabas sente moras no tenke ba halo tratamentu medika iha sentru saude Ermera.
Arguidu sira pratika hahalok sira nee ho forma livre, deliberada ho konsiensia rasik tau forsa hamutuk hodi arguidu GS provoka lezadu hanesan meius ida atu arguidu FG realiza sira nia intensaun hakanek lezadu ho ai, hodi hamosu fitar, moras iha lezadu nia isin lolon, hatene hela katak hahalok sira nee fo sofrementu no moras, tuir lo-loos arguidu koalia deit ho didiak, no hatene hela mos katak hahalok sıra nee proibi no sei hetan kastigu, maibė arguidu hakarak halo nafatin hanesan saida mak deskreve iha leten.
Konstitui arguidu GS, FG nuudar ko-autor material ho forma konsumada ba pratika krimi ida “Ofensas ba Integridade Fizika Simples tuir artigu 145°, husi Kodigu Penal.
Hatan ba akuzasaun neebe iha, arguidu deklara katak, faktus neebe konsta iha akuzasaun la loos hotu.
Arguidu deklara, momentu neeba laos arguidu mak halo agresaun hasoru lezada, maibe lezada mak rakut uluk arguidu nia faru, no lori tudik sona iha arguidu nia liman.
Audensia julgamentu nee prezide husi Juiz Singular Ivan Patrocino, Ministeriu Publiku reprezenta husi Prokurador Ricardo Leite, arguidu hetan asistensia legal husi Defensor Publiku Humberto Alves.
(ter)
