DILI, STLTIMORLESTE.com – Ministru Prezidensia Konselhu Ministru (MPKM), Agio Pereira fo pose Anita Tavares Ribeiro de Jesus nuudar Komisaria Komisaun Funsaun Publika durante tinan 4.
Anita Tavares okupa kargu nuudar Komisaria Funsaun Publika too iha loron 22 Novembru 2028, tanba hetan nomeasaun husi Rezolusaun Governu Nu. 61/2024, loron 21 fulan Novembru.
“Anita Tavares okupa ona kargu Diretora Rekursu Umanu iha Ministériu Edukasaun no mos kargu Diretora iha Sekretariadu Komisaun Funsaun Publika, hatene didiak kona-ba difikuldade, dezafiu no kompleksidade misaun nian neebe nia simu ohin,” hatete MPKM, Agio Pereira liu husi nota komunikadu, neebe STL asesu iha Sesta (20/12/2024).
Nia hatutan, hafoin tinan 15 husi ninia kriasaun, Komisaun Funsaun Publika, agora iha mandatu dahaat, hasoru dezafiu sira neebe lansa husi Programa IX Governu Konstitusional nian neebe inklui hadia husi efikasia, efisiensia no profisionalizmu Administrasaun Publika nian, ba prestasaun servisu publiku neebe diak liu, nuudar fator krusial ba implementasaun polítika no programa dezenvolvimentu neebe lori ba redusaun pobreza no progresu no moris diak populasaun nian.
Iha sentidu ida nee, Governu aprova ona planu reforma jestaun rekursu umanu iha Administrasaun Publika, neebe iha Komisaun Funsaun Publika no Ministeriu Finansa hanesan forsa entre objetivu sira husi planu reforma nian, Agio Pereira destaka estabelesimentu hosi estrutura foun ida ba funsaun públika no investimentu ida neebe aumenta iha dezenvolvimentu kapital umanu, hodi permiti atrai no mantén talentu joven sira ba funsaun públika”.
Ministru Prezidensia Konselhu Ministru defende mos katak paradigma tuan funsionariu publiku nuudar ema neebe restritu atu kumpri regra, prosedimentu no kalendáriu presiza troka ho vizaun moderna, foka ba rezultadu, inovasaun no impaktu real ba sosiedade. Mentalidade funsionariu publiku sira ohin loron nian presiza marka ho valor sira hanesan proatividade, empatia no kompromisu ba exelensia.
Iha fatin hanesan, Anita Tavares Ribeiro de Jesus espresa ninia kompromisu atu halao ninia knaar ho imparsialidade masimu, dedikasaun no responsabilidade no sempre tau iha konsiderasaun loloos interese Estadu nian.
“Programa Governu nian no valor sira funsaun públika nian no kompromete atu serbisu iha defeza ba bem publiku no serve komunidade no povu, ho imparsialidade, onestidade, profisionalizmu no koresaun, hodi salvaguarda interese aas liu nasaun nian,”afirma Anita Tavares
Serimonia tomada pose nee hetan partisipasaun husi Sekretaria Estadu ba Igualdade, Elvina de Sousa Carvalho, Sekretária Estadu ba Komunikasaun Sosial, Expedito Dias Ximenes, Prezidente CFP, Agostinho Letêncio de Deus, Komisariu CFP, Fausto Freitas da Silva, José Telo Soares Cristovão no Agapito da Conceição, Komisariu Komisaun Anti Korrupsaun (CAC), Rui Pereira, Inspetór Jeral Estadu, Francisco de Carvalho, Provedor Direitus Umanus no Justisa, Virgílio Guterres, Xefe Estadu Maiór husi Ministru Prezidensia Konselhu Ministru, Vitor Maia, husi Diretor Jeral Administrasaun Prezidensia Konselhu Ministru, Pedro Feno, husi Diretór Jeral Administrasaun no Finansas Ministeriu Edukasaun, husi Sebastião Pereira husi Ministwriu Administrasaun Estatal, husi Paroku de Balide, Angelo Trindade no reprezentante sira seluk husi CFP.
(alb)
