BAUKAU, STLTIMORLESTE.com – Ministeriu Petroleum no Rekursus Minerais (MPRM) liu husi Autoridade Nasional Minerais (ANM) atribui lisensa prospesaun ba kompanhia Internasional 2, hodi peskiza rekursus minerais metalikus no laos metalikus iha Munisipiu Baukau.
Iha loron 12 Marsu tinan nee, Estadu Timor Leste marka tan pasu signifikante iha Munisipiu Baukau, tanba atribui tan lisensa prospesaun ba kompanhia Internasional 2 husi Singapura halo peskiza rekursus minerais metalikus no laos metalikus iha Postu Administrativu Baukau Vila no Vemasi.
Kompanhia 2 refere mak hanesan Nova Energy Resource neebe sei responsabiliza no peskiza bloku minerais manganez iha Suku Vemasi, Kaikua, Ostiku, Uaigae no Uatulari iha Postu Vemasi no kompanhia Taishegts sei responsabiliza no peskiza bloku sementi iha Kaisidu Tirilolo no Triloka Postu Baukau Vila.
Ofisialmente lisensa prospesaun ba rekursus minerais metalikus no laos metalikus atribui ona ba kompanhia peskizador ho durasaun tempu peskiza durante tinan 4 iha terenu.
“Fahe lisensa agora nee ba metalikus no non-metalikus, buat sira nee ita halo nia objetivu atu hasae kresimentu ekonomia no atu kontribui ba buat rua importante, ida mak kriasaun kampu trabalho no ida seluk mak kontribui ba ekonomia lokal,” hatete Ministru Petroleum no Rekursus Minerais, Francisco da Costa Monteiro liu husi nia diskursu hafoin atribui lisensa prospesaun ba kompanhia peskizador sira, iha salaun sentru konvensoens Vila Antiga, Baukau, Kuarta (12/03/2025).
Governante nee argumenta, peskiza husi kompanhia internasional 2 refere bainhira remata no rekursu minerais hatudu liu husi peskiza hatudu rezultadu diak, Estadu Timor Leste liu husi kompanhia sei investe hodi dezenvolve no kria kampu trabalhu hodi emprega Timoroan nomos bele sustetavel ekonomia iha rai laran makaas liu tan.
Tanba nee Governu nafatin komitmentu hodi dudu setor minerais liu husi peskiza sira iha rai maran hodi identika no dezenvolve durante mandatu tinan 5 bele fo benefisiu ba Timor Leste.
“Ita tenke orgulhu, konsolida fo konfiasa nafatin, agora ba oin ita aposta makaas ba dezenvolvimentu ekonomia, tanba aspektu nee mak bele habelar kampu trabalhu no halo kapasidade ekonomia boot liu tan,” Ministru Francisco akresenta
MPRM nee husu ba Autoridade Sivil no Militar, inklui veteranus no joven sira iha Munisipiu Baukau, atu koopera no kontribui politika Governu neebe liu husi kompanhia Internasional sira iha terenu halo peskiza, nunee bele hetan rezultadu pozitivu ba rai doben Timor Leste iha futuru.
Reprezentante Prezidente Autoridade Munisipiu Baukau, atual Diretor Ajensia Planeamentu, Francisco Guterres konsidera, atribuisaun lisensa prospesaun ba peskiza rekursus minerais no metalikus pasu importante ba Timor Leste no hakat ba era foun iha prosesu dezenvolvimentu, neebe reprezenta Kompromisu Governu nian hodi promove investimentu estratejiku iha setor mineral no diversifika ekonomia hodi hamenus Timor Leste nia dependensia externa no futuru bainhira halo ona explorasaun sei hamosu empregu no envolve komunidade sira iha area infraestrutura.
Autoridade Munisipal garante, projetu refere bainhira termina no halo explorasaun, sei lori Sinal pozitivu neebe dura ba Timor Leste, tanba nee Autoridade Munisipal Baukau enkoraja parte empreza neebe hetan lisensa, too iha terenu halo peskiza, tenke ativu hodi kolabora, tanba komunidade sira sei fasilita atividade tekniku, maibe tenke promove ambiente ho harmonia.
“Hau husu ba empreza sira atu fo prioridade ba praktika etika iha operasaun sira, inklui utiliza ho responsabiliza iha rekursu natural no protesaun ambiental,” nia rekomenda.
Francisco salienta, kodigu mineiru estabelese ho mata dalan klaru, tanba nee tenke garante atividade hotu halao ho responsabilidade ambiental sosial no ekonomia, nunee bele reprezentante rezerva padraun sosial sustentabilidade internasional no promove moris diak ba komunidade lokal sira.
Entretantu reprezentante kompanhia 2 refere, Izzie Wong agradese ba Estadu Timor Leste, tanba bele fo ona fiar hodi halo peskiza iha Munisipiu Baukau, nunee sei garante peskiza sei lao ho susesu iha futuru no kompromete sei kontribui kresimentu ekonomia iha Rai laran.
“Iha ita nia kooperasaun kompanhia hakruk ba lejislasaun lokal sira neebe vigora iha nasaun, respeitu soberania no respeita ambiental,” nia promete.
Nia garante, prosesu peskiza sei la fo impkatu ba ambiental, tanba parte kompanhia sei utiliza deit ekipamentus neebe avasadu neebe minimiza impaktu ambiental no proteje rekursu natural
Reprezentante kompanhia nee promete, aliende peskiza parte kompanhia mos sei apoiu Edukasaun, Saude infraestrutura ba komunidade lokal sira neebe afetadu, aliende mos sei emprega Timoroan no fasilita formasaun tekniku seluk hodi garante futuru naroman ba Timoroan hotu.
(EST 1)
