DILI, SLTIMORLESTE.com – Ministeriu Saúde (MS) hamutuk ho Foyal Australia College of Surgeons no The Fred Hollows Foundation realiza workshop nasional planu estratejiku saude matan ba tinan 2026 too 2030.
Hatete Diretor Nasional ba Prevensaun Kontrolu Doensas iha Ministeriu Saude (MS), Florindo Pinto ba jornalista sira iha Timor Plaza, Sesta nee (14/03/2025).
Nia hatete, atividade ida hetan apoiu husi parseiru internasional sira hodi haree liu ba saude publiku. No atividade ida hetan apoiu masimu husi parseiru internasionál Foyal Australia College of Surgeons no The Fred Hollows Foundatio hodi haree liu ba iha ameasa saude publiku matan.
“Ita iha problema matan nian neebe mak ita hasoru hanesan katarak, klaut koma no refratif erro,” nia esplika.
Nia tenik, tuir dadus neebe mak Ministériu Saúde hetan problema matan katarak mak barak liu.
“Ita iha relatoriu kona-ba problema matan nee katarak iha 1000 resin, sira nee halo operasaun ho susesu, husi nunee sira nee balu mai husi idade neebe mak avansadu no balu tanba efeitu husi uza telefone no mos foer sira ne’ebé mak tama,” nia esplika.
Nia salienta, atividade ida nee hetan partisipasaun masimu husi hospital referal lima mak hanesan Baukau, Maliana, Suai, Oekusi no mos Maubesi.
Iha fatin hanesan, Sara Webster, Country Manager Pacific and Timor Leste, The Fred Hollow Foundation hateten, kolaborasaun ida oinsa atu bele hametin diak liu tan servisu saude matan iha Timor Leste.
“Ami halo kolaborasaun ho Governu Timor Leste hodi halo servisu haree liu ba saude matan, tanba nee ami mos koko ona atu hametin servisu saude matan iha nivel munisípiu sira hotu,” nia koalia.
Nia hatutan, ema hotu-hotu iha Timor Leste presiza asesu ba saude matan.
“Servisu Saude matan nee susesu duni tanba ema barak mak asesu, tanba nee agora ita presiza kontinua halo servisu ida nee ba tinan lima tan,” nia informa.
Nia deklara, ami mos sei halo kolaborasaun nafatin ho Governu Timor Leste no mos parseiru sira seluk atu oinsa bele tau matan ba servisu saude matan iha Timor Leste.
“Ita presiza servisu hamutuk hodi haree ba setor saude nian, liu-liu haree ba servisu saude matan, tanba nee ami sente kontente tanba ema barak mak mai hodi servisu hamutuk ho ami hodi haree ba servisu saude matan,” nia koalia.
Nia afirma, sira mos sei harii klinika iha hospital referal sira hanesan Baukau, Maliana no Suai hodi suporta mos doutor rua iha Munisipiu Dili atu nunee bele asegura klinika sira.
(jen)
